მამარდაშვილს ვალენსიაში კარგი სეზონი ჰქონდა და მისი შეძენა ნიუკასლსა და ატლეტიკოს სურს, ევრო 2024-ის შემდეგ კი მამარდას გადაბირებით კიდევ რამდენიმე გუნდი დაინტერესდა.
იყო საუბრები ბაიერნში ტრანსფერზე, რაზეც მამარდაშვილმა ასეთი კომენტარი გააკეთა:
"ბაიერნს ჩემი შეძენა გასულ ზაფხულს სურდა. მამაჩემი და ჩემი აგენტი მიუნხენში ჩავიდნენ და მოლაპარაკებებს აწარმოებდნენ. როგორც ვიცი, ისინი 35 მილიონის გადახდას აპირებდნენ, თუმცა ამჟამად ბაიერნს მსოფლიოს საუკეთესო მეკარე ჰყავს. ბაიერნში მხოლოდ იმ შემთხვევაში წავალ, თუ სათამაშო დრო მექნება, თუ არ ვითამაშებ, არ წავალ."
ამ კომენტარიდან რამდენიმე კვირაში ირკვევა, რომ ევროპის ჩემპიონატის დასრულების შემდეგ, დიდია ალბათობა, რომ მანუელ ნოიერმა ბაიერნი დატოვოს და MLS-ში წავიდეს, რაც მამარდაშვილის რეკორდმაისტერში გადასვლის შანსს ზრდის.
"ჩემი MLS-ში გადასვლა საინტერესო ვარიანტია, რასაც განვიხილავ. ამ თემაზე ბასტიან შვაინშტაიგერს უნდა გავესაუბრო, რომელიც იქ თამაშობდა. კარგად უნდა დავფიქრდე და ამის შემდეგ გადავწყვიტო. ერთადერთი, რაც ამერიკაში გადასვლაში ხელს მიშლის ისაა, რომ იქ ხელოვნურ ბალახზე თამაშობენ, რაც მეკარისთვის კომფორტული არ არის", - განაცხადა ნოიერმა.
ფაქტია, ნოიერი MLS-ში გადასვლაზე ფიქრობს და თუ ყველაფერი ისე დალაგდა, როგორც ზემოთ აღვნიშნეთ, ასეთ სცენარს მივიღებთ - ნოიერი ბაიერნს დაემშვიდობება, რომელსაც შეცვლის მეკარე, ევრო 2024-ზე მოგერიებული ბურთების საუკეთესო მჩვენებლით (29 სეივი). ნოიერი მამარდას კუმირია.
როგორც ჩვენთვის არის ცნობილი, სეზონის წინამოსამზადებელ შეკრებას მამარდაშვილი ვალენსიასთან ერთად დაიწყებს, რადგან "ღამურებთან" მოქმედი კონტრაქტი აკავშირებს და კვლავ მათ საკუთრებაშია.
"თუ ევროპის ჩემპიონატზე გერმანიას შევხვდებით, ჩემს კუმირს ვნახავ და მაისურს ვთხოვ", - მამარდაშვილმა ეს ოცნება ვერ აიხდინა, მაგრამ თავისი კუმირის შეცვლა ევროპის ტოპ გრანდში, ასევე ოცნების ახდენა და დიდი გამოწვევა იქნება.
