რამდენიმე წუთის წინ ლიმასოლში დასრულდა ევრობასკეტის მორიგი მატჩი, სადაც საქართველოს კალათბურთელთა ნაკრები საბერძნეთს დაუპირისპირდა. ქართველებმა 53:94 წააგეს და საბერძნეთმა ზედიზედ მესამე გამარჯვება იზეიმა.
შეხვედრის შესახებ, ნაკრების მთავარმა მწვრთნელმა, ალექსანდრ ჯიკიჩმა ისაუბრა:
“რა თქმა უნდა, რთული თამაში იყო, თუმცა ჩვენ რთული არჩევანის წინაშე ვიყავით, ბოლო 2 მატჩი მიყოლებით ვითამაშეთ, კალათბურთელებისთვის ჯანმრთელობის შენარჩუნება ყველაზე მნიშვნელოვანია, ამიტომ არ გავრისკეთ. არსებული ყველა პრობლემის გამო, ალბათ ორი ან სამი დაშავებული მოთამაშე გვეყოლებოდა, იყო მიკროტრავმები და ეს არჩევანი გავაკეთეთ. ჩვენ ვიცით, რა არის ჩვენი მიზანი, რატომ ვართ აქ, ჩვენ მებრძოლი გუნდი ვართ და ბრძოლა გრძელდება.
დღეს ჩვენ ახალგაზრდა კალათბურთელები ვათამაშეთ, გამოცდილება მიიღეს, რაც ძალიან მნიშვნელოვანია. იცით, საბერძნეთის რიგებში მოთამაშე კალათბურთელების შესახებ და ვფიქრობ, ჩვენი ახალგაზრდა კალათბურთელებისთვის მნიშვნელოვანია რას ისწავლიან ასეთი თამაშებიდან.
თორნიკე შენგელიას მდგომარეობის შესახებ, დეტალურ ინფორმაციას ვერ მოგაწვდით, პატივისცემით, უარს ვამბობ ვუპასუხო ამ კითხვას. თუ ეს თქვენთვის საინტერესოა, გეტყვით, რომ შემდეგ მატჩში ითამაშებს. "
დღეს C ჯგუფის კიდევ 2 მატჩი გამართება, ესპანეთი - კვიპროსი 19:15 საათზე დაიწყება, ბოსნია და ჰერცეგოვინა - იტალია 22:30 საათზეა ჩანიშნული.
ჯგუფიდან 4 საუკეთსო გადის, საქართველოს ნაკრებს კვიპროსთან და ბოსნია და ჰერცეგოვინასთან აქვს სათამაშო და ჯგუფური ეტაპის დაძლვა შეუძლია, ორივე მატჩის მოგების შემთხვევაში შესაძლოა მესამე ადგილიც დაიკავოს.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში ტარდება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით ასპარეზობს და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველოს ნაკრების ოფიციალური შემადგენლობა ევროპის ჩემპიონატზე:
რატი ანდრონიკაშვილი, კამარ ბოლდუინი, გიორგი ოჩხიკიძე, კახა ჯინჭარაძე, დუდა სანაძე, ალექსანდრე ფევაძე, თორნიკე შენგელია, სანდრო მამუკელაშვილი, ბექა ბურჯანაძე, გიორგი კორსანტია, გოგა ბითაძე, გიორგი შერმადინი.
საქართველოს ნაკრების მატჩების განრიგი, თბილისის დროით:
საქართველო – კვიპროსი - 2 სექტემბერი, 19:15 საათი
საქართველო – ბოსნია-ჰერცეგოვინა - 4 სექტემბერი, 16:00 საათი
