28 წლის მცველის, ლუკა გადრანის ბეითარში ტრანსფერი წარმატებული გამოდგა. ლუკა გუნდის ძირითადის ფეხბურთელი გახდა, 90 წუთს თამაშობს, მაღალ შეფასებებს იღებს და საკვანძო ფეხბურთელი გახდა.
გადრანის ბეითარი ჩემპიონობისთვის იბრძვის. 24 ტურის შემდეგ, გუნდს 51 ქულა აქვს და მეორე პოზიციაზეა, თუმცა მსოფლიოში მიმდინარე მოვლენების გამო, ისრაელის ჩემპიონატი დროებით შეჩერებულია.
"12 მარტამდე ყველა აქტივობა შეჩერებულია. ამ ქვეყანას მსგავსი სიტუაციების დიდი გამოცდილება აქვს და შეიძლება ითქვას, ყველაფერს თავს კარგად ართმევენ. რომ ვთქვა ხალხი პანიკაშია, ესეთი შეგრძნება არ არის, რადგან როგორც ვთქვი, მიჩვეულები არიან.
აქ რომ ვიმყოფები, ყველა ჩემი ოჯახის წევრი ნერვიულობს, მე კი ვცდილობ, ყველა დავაწყნარო. ცხელ წერტილში არ ვიმყოფები. კლუბმაც ხელი შეგვიწყო და ეგვიპტის საზღვართან დაგვაბინავა, სადაც მშვიდობაა და აქ ინდივიდუალურად ვვარჯიშობთ."
ისე დაემთხვა, რომ როცა ბეითარში მიხვედი, გუნდმა მოგებების სერია დაიწყო...
"დიახ, მას შემდეგ, რაც ბეითარში გადმოვედი, ისე მოხდა, რომ მოგებები დავიწყეთ და მიხარია, რომ ამაში ჩემი წვლილი შევიტანე. გუნდის გარდა, ყოველდღიურად ვმუშაობ იმისთვის, რომ ჩემს ნაკრებს და ქვეყანასაც იგივენაირად გამოვადგე."
კაირათში ძირითადის ფეხბურთელი იყავი, თუმცა ბოლო დროს, თამაში საერთოდ არ გიწევდა, რა იყოს ამის მიზეზი?
"კაირათში არ თამაშის მიზეზი ტრავმები იყო. მადლობა ღმერთს, ამ რთული სიტუაციის შემდეგ, დავბრუნდი და ტრავმიდან დაბრუნების შემდეგ, ბეითარში ჩემს შესაძლებლობებს ვამტკიცებ. კაირათი უკვე წარსულია და მხოლოდ დღევანდელ დღესა და მომავალზე ვფიქრობ."
ბეითარი ცხრილის ლიდერი იყო, თუმცა ბოლო თამაშები ვერ მოიგეთ და მეორე ადგილზე ხართ...
"ჯერ ყველაფერი წინაა. ჩვენი მიზანია, რომ თამაშიდან თამაშამდე მოვუმატოთ და პირველი ადგილი დავიბრუნოთ. გუნდის მენტალიტეტი ისაა, რომ კონკრეტული თამაშისთვის მოემზადონ, კონკრეტული მატჩი მოიგონ და შორს არ გაიხედონ. მათი ეს მიდგომა ძალიან მომწონს.
ისრაელის და ყაზახეთის ჩემპიონატების შედარება
"ისრაელის ჩემპიონატი ყაზახეთის ჩემპიონატზე მაღალი დონისაა, აქ უფრო კარგი ფეხბურთელები არიან, ინფრასტრუქტურა, გულშემატკივარი და ხალხის სპორტისადმი მიდგომა უმაღლეს მწვერვალზეა ასული. ადგილობრივი ფეხბურთელებიც სწრაფები და ტექნიკურები არიან.
ერთა ლიგაზე ჩვენი ნაკრების მეტოქეები ჩრდ.ირლანდია, უკრაინა და უნგრეთი იქნებიან, როგორ შეაფასებდი შანსებს?
"ჩემი აზრით, საქართველოს ნაკრებს აქვს იმის ამბიცია და შესაძლებლობა, რომ ესეთ ნაკრებებთან წარმატებულად ითამაშოს. მთავარია, ყველა ოპტიმალურ ფორმაში იყოს. ყველამ დაინახა, რომ საქართველოს ნაკრებს ყველასთან მოგება შეუძლია."
ამ მატჩებამდე, მარტში ამხანაგური თამაშები გვაქვს, სადაც შენი ფორმიდან გამომდინარე, დიდია ალბათობა, რომ ეროვნულ ნაკრებში გამოგიძახონ.
"ვემზადები და ყველაფერს ვაკეთებ, რომ სანაკრებო პაუზას ფორმაში შევხვდე. ისრაელის ჩემპიონატი შეწყვეტილია, თუმცა ინდივიდუალურად ვვარჯიშობ და თავს კარგად ვგრძნობ. ყველა ამბობს, რომ საქართველოს ნაკრებს დაცვაში პრობლემები აქვს, მე კი ვეცდები, ამ პრობლემის გამოსწორებაში ჩემი წვლილი შევიტანო."
