ყველაზე მეტად გამოსარჩევია მეორე ტაიმის შუაში მომხდარი ეპიზოდი, როდესაც ლაუტარო მარტინესთან გათამაშებული ძალიან ლამაზი კომბინაციის შემდეგ, "ნერაძურის" ფორვარდმა "როხიბლანკოს" კარს რამდენიმე მეტრიდან ააცილა. მას ჰქონდა სხვა მომენტებიც სტუმართა მცველების დამსახურებით, რომლებიც აშკარად გადართულები უფრო იყვნენ არგენტინელ შემტევზე, ვიდრე ერთადერთი ბურთის ავტორზე.
ანტი-გმირობიდან გმირობამდე ერთი ნაბიჯია და "შავ-ლურჯების" რვიანმა შეხვედრის მიწურულს მაინც შეძლო ამ ნაბიჯის გადადგმა. მასპინძლების კაპიტნის დარტყმის შემდეგ, დამატებაზე ეფექტურად სწორედ 34-წლის ფორვარდმა ითამაშა. შეგახსენებთ, რომ ის მეაცაზე გამოჩნდა ჯერ კიდევ 2009-ში, მაგრამ ადგილის დამკვიდრება მან ვერ მოახერხა.
არნაუტოვიჩმა მოიარა არაერთი გუნდი, 14-წლის შემდეგ კი ინტერნაციონალეში დაბრუნება მოხდა. ის ძირითადად შემოდის სათადარიგოთა სკამიდან და ანალოგიური რამ "ინდიელებთან" მატჩშიც განმეორდა. მარკუს ტურამის დაზიანების შემდეგ, მოედანზე სწორედ ავსტრიელი ფორვარდი გამოჩნდა. მისი მონაგარი მილანურ კლუბში გამოიყურება ძალიან მოკრძალებულად: 27 მატჩი და სულ რაღაც 4 ბურთი.
