მანჩესტერ სიტიმ პრემიერ ლიგის ახალი სეზონი დაიწყო წარუმატებლად. სამი ტურის შემდეგ, მხოლოდ სამი ქულა და მე-13 ადგილი. "ქალაქელებმა" ჯერ გაანადგურეს ვულვერჰემპტონი, მაგრამ შემდეგ, წააგეს ტოტენჰემსა და ბრაიტონთან. პირველ 3 ტურში მხოლოდ ერთი მოგება არის ყველაზე ცუდი სტარტი პეპ გუარდიოლას კარიერაში.
აქამდე, ესპანელ მწვრთნელს სეზონი ყველაზე მძიმედ დაუწყია 17 წლის წინ, როდესაც ის ბარსელონას მთავარი გუნდის დამრიგებლად დაინიშნა. პრიმერა დივიზიონის 2008/09 წლების სეზონის 3 ტურის შემდეგ, კატალონიელებს სულ რაღაც 4 ქულა ჰქონდათ. იმის შემდეგ, ეტიჰადის ბინადრების ამჟამინდელი დამრიგებლის გუნდებს 3 ტურის შემდეგ 6 ქულაზე ნაკლები არასდროს ჰქონიათ.
ყველაფერი შეიცვალა ამ სეზონში, რომელშიც როგორც აღვნიშნეთ, ხოსეპმა თავის სამწვრთნელო კარიერაში ახალი ანტირეკორდი დაამყარა. საინტერესოა ისიც, რომ "ბლაუგრანას" 17 წლის წინანდელი მძიმე სტარტის მიუხედავად, 54 წლის სპეციალისტმა თავის მშობლიურ გუნდს იმ სეზონში ტრებლი მოაგებინა.
