მებრძოლი გოგო საქართველოდან, რომელმაც პირდაპირი მნიშვნელობით, იბრძოლა, გაიმარჯვა და გახდა პირველი ქართველი გოგო, რომელმაც IMMAF-ის ევროპის ჩემპიონობა იზეიმა. 16 წლის ელენე გლურჯიძის გზა გამარჯვებამდე მარტივი არ ყოფილა და არც ეს გამარჯვებაა მისი შრომის მთავარი მიზანი.
16 წლის ელენე გლურჯიძე გამარჯვებისა და სამომავლო მიზნების შესახებ, LaGazzetta.ge - სთან ინტერვიუში საუბრობს:
- როდის დაინტერესდი შერეული ორთაბრძოლებით და რამდენი ხანია რაც ამ სპორტში ხარ ჩართული?
- საბრძოლო ხელოვნებით დავინტერესდი 2023 წლის მეორე ნახევარში, როდესაც დავინახე ჩემი ძმის კრივის სავარჯიშო ხელთათმანები და მომინდა მისი შესწავლა, ხოლო 2024 წლის დასაწყისში დავიწყე სიარული შერეულ ორთაბრძოლებზე.
- IMMAF-ის 2026 წლის ევროპის ჩემპიონატზე რას იტყვი, რამდენად ძლიერი კონკურენცია იყო?
- IMMAF არის ერთ-ერთი ყველაზე ცნობილი სამოყვარულო ორგანიზაცია, რომელიც ყოველწლიურად აორგანიზებს მაღალი დონის ჩემპიონატებსა და აძლევს სპორტსმენებს საშუალებას თავიანთი შესაძლებლობები გამოსცადონ უფრო კარგ ორგანიზაციაში მაღალი დონის სპორტსმენებთან.
- რას ნიშნავს შენთვის ეს გამარჯვება და რამდენადაა მოტივაციის მომცემი?
- საკმაოდ დიდხანს ვემზადებოდი და ეს გამარჯვება ნიშნავს, რომ ჩადებული შრომა დამიფასდა. მოტივაციის მომცემი რა თქმა უნდა არის და დავრწმუნდი, რომ თავდაუზოგავი შრომით და დისციპლინით ყოველთვის მივაღწევ დასახულ მიზანს.
ამ დრომდე 9 ბრძოლა მაქვს ჩატარებული აქედან ერთი არის საქართველოს 2026 წლის ჩემპიონატი, ხოლო დანარჩენი IMMAF-ის მიერ ჩატარებული ჩემპიონატები. მიმიღია მონაწილეობა ასევე ჯიუ-ჯიცუს ტურნირებზე, სხვადასხვა წონით კატეგორიებში.
- შენი მთავარი მიზანი რა არის?
- ჩემი მიზანია ის შრომა, რასაც ვდებ დამიფასდეს, ვასახელო ჩემი ქვეყანა და ვიყო საამაყო ქართველი.
- რამდენად რთულია სპორტისა და განათლების შეთავსება?
- საკმაოდ ძნელია, მაგრამ არ არის შეუძლებელი და თუ გულით გინდა ნებისმიერ დაბრკოლებას შეეჭიდები, არ აქვს მნიშვნელობა რა იქნება.
- რას ეტყოდი შენი ასაკის გოგოებს, ვინც საბრძოლო ხელოვნებაშია ჩართული ან სურს დაკავდეს სპორტით?
⁃ თავიდან შეიძლება საშიში მოგეჩვენოთ, მაგრამ საერთოდაც არ არის. აუცილებელია მოთმინება, ნებისყოფა და დაუღალავი შრომა. არ დანებდეთ, გააგრძელეთ და ყველაფერი კარგად იქნება.
