ანგარიში „დეზებმა" გახსნეს. 25-ე წუთზე ტოტენჰემი ჰენგ-მინ სონმა დააწინაურა. სამხრეთკორეელისთვის „მეთოფეების" კარში ეს რიგით მე-8 გოლი იყო, რითაც ამ დაპირისპირების მეორე საუკეთესო ბომბარდირი გახდა. სონი მხოლოდ ყოფილ თანაგუნდელს - ჰარი კეინს ჩამორჩება, რომელსაც არსენალის კარში 14 გოლი აქვს გატანილი.
ანგარიშის გახსნის შემდეგ ეინჯ პოსტეკოღლუს გუნდმა ინიციატივა სრულად მოწინააღმდეგეს დაუთმო, არსენალმა კი, რა თქმა უნდა, სტანდარტული მდგომარეობიდან შექმნილი შანსით უპასუხა. მე-40 წუთზე ჩამოწოდებულ კუთხურს გაბრიელ მაგალაესი გამოეხმაურა, მისი დარტყმული ანტონინ კინსკის კარში აღმოჩნდა, თუმცა, როგორც გაირკვა, კარის ხაზის გადაკვეთამდე ბურთი დომინიკ სოლანკეს შეეხო, გამათანაბრებელი ბურთი ინგლისელი ფორვარდის ავტოგოლად გაფორმდა. ტაიმის დასრულებამდე მიკელ არტეტას გუნდმა კიდევ ერთხელ გაისროლა. ამჯერად ლეანდრო ტროსარმა გაიტანა და საკუთარ გუნდს პირველი ნახევარი მოაგებინა.
მეორე ტაიმში ბევრი არაფერი შეცვლილა. ჩამორჩენის მიუხედავად „თეთრებმა" შეტევაში ბევრი ვერაფრის შექმნა ვერ მოახერხეს. საბოლოოდ პირველ ნახევარში დაფიქსირებული ანგარიში უცვლელად დარჩა.
ამ გამარჯვებით არსენალმა პრემიერ ლიგის ტიტულისთვის ბრძოლაში განაცხადი გააკეთა. ლიდერ ლივერპულს „მეთოფეები" ახლა მხოლოდ 4 ქულით ჩამორჩებიან, თუმცა სათქმელია, რომ მერსისაიდელებს მათზე ერთით ნაკლები შეხვედრა აქვთ გამართული.
