მართალია, ლონდონელები არიან პირველ ადგილზე (86 ქულა), თუმცა "ქალაქელებს" ჩატარებული აქვთ ერთი შეხვედრით ნაკლები და მათ ანგარიშზე 85 ქულა არის. "მეთოფეებისთვის" "ლურჯების" მოგება არასახარბიელო იქნება, ქულების დაკარგვის შემთხვევაში კი მათი საჩემპიონო შანსები საგრძნობლად გაიზრდება.
მსგავსი რამ ხდებოდა 25 წლის წინ, 1998-1999 წლების სეზონის ბოლოს, როდესაც ჩემპიონობისთვის მანჩესტერ იუნაიტედი და სწორედ "კანონირები" იბრძოდნენ. 37 ტურის შემდეგ, პირველ პოზიციას 76 ქულით იკავებდნენ "წითელი ეშმაკები", მე-2 ადგილს კი, 75 ქულით, არსენ ვენგერის გუნდი. ყველაფერი გადაწყდა ბოლო ტურში.
ჰაიბერის ბინადრების მოწინააღმდეგე იყო ბირმინგემის ასტონ ვილა, "მანკუნიანელების" კი ისევ და ისევ - ჰოტსპური. ინგლისურ ფეხბურთში ისმოდა კითხვა: წაართმევდნენ თუ არა ლონდონელები ქულებს სერ ალექს ფერგიუსონის შეგირდებს, რითაც მეზობელ და მოსისხლე მტერს, არსენალს ჩემპიონობისკენ გზას გაუხსნიდნენ.
"მეთოფეებმა" "ლურჯ-წითლები" დაამარცხეს, პარალელურ შეხვედრაში კი სპურსი 42-ე წუთამდე იგებდა, თუმცა შემდეგ, ოლდ ტრაფორდის ბინადრებმა დევიდ ბექჰემისა და ენდი კოულის გოლებით დააქამბექეს. მანჩესტერმა სეზონი 79 ქულით დაასრულა, "კანონირებმა" კი - 78 ქულით, ტოტენჰემმა ვერაფერი მოახერხა.
საინტერესოა, რა იქნება მიმდინარე სეზონში. აღსანიშნავია, რომ დღევანდელი შეხვედრა ჰოტსპურისთვის სხვა მიზეზის გამოც არის პრინციპული. მარცხის შემთხვევაში, ლონდონელები ჩემპიონთა ლიგაზე მოხვედრის თეორიულ შანსს დაკარგავენ. აქვე დავამატებთ, ხოსეპ გვარდიოლას გუნდის წინააღმდეგ გასამართი მატჩი 23:00 საათზე დაიწყება.
