მსოფლიო ჩემპიონატის საკვალიფიკაციო ეტაპის მატჩს საქართველოს ნაკრები 4 სექეტმბერს, თურქეთის წინააღმდეგ ჩაატარებს.
ვეტერანმა ქართველმა ფეხბურთელმა და თურქებისთვის კარგად ცნობილმა შოთა არველაძემ, რომელიც ამჯამად კასიმფაშას თავკაცია, მოახლოვებულ მატჩზე და ხვიჩა კვარაცხელიაზე ისაუბრა.
"გასულ წელს ევროპის ჩემპიონატზე ვითამაშეთ და ახლა ჩვენი მიზანი კიდევ ერთი ისტორიის დაწერა და მსოფლიო ჩემპიონატზე გასვლაა.
საქართველოს ნაკრებს კარგი ფეხბურთელები ჰყავს, ისინი ტოპ ლიგებში თამაშობენ და ჩვენს ქვეყანაში ყველა იმ განწყობაზეა, რომ თურქეთს უნდა მოვუგოთ, თუმცა რთული თამაში იქნება.
კვარაცხელიას სახით საქართველოს უძლიერესი მოთამაშე ჰყავს, რომელსაც შეუძლია, რომ ნებისმიერ მეტოქეს მარტომ აჯობოს.
მან მოიგო ჩემპიონთა ლიგა, გაიტანა გოლი ფინალში, გააკეთა საგოლე გადაცემები. ძლიერი მოთამაშეა, სწრაფი და საოცარი ტექნიკით", - განაცხადა არველაძემ.
