მადრიდის რეალი კოპა დელ რეის მერვედფინალში სენსაციურად დამარცხდა ლა ლიგა 2-ის მე-17 ადგილოსან ალბასეტესთან. მატჩის გმირად მოგვევლინა ხეფტე ბეტანკორი, რომელმაც "სამეფო კლუბს" 2 ბურთი გაუტანა. საინტერესოა, რომ კარიერის მთავარ თამაშამდე მან 20-ზე მეტი კლუბი მოიარა.
ესპანელი თავდამსხმელი 2011 წელს მცირე ხნით ირიცხებოდა სანტიაგო ბერნაბეუს ბინადრების აკადემიაში, შემდეგ კი მის გზაზე იყო ავსტრიული, ბერძნული, რუმინული და კვიპროსული კლუბები. "ქუესო მეკანიკოს" ამჟამინდელმა ფორვარდმა ყველაზე დიდ წარმატებას მიაღწია პანსერაიკოსში, რომლის შემადგენლობაში ის 19 გატანილი ბურთით საბერძნეთის უმაღლესი ლიგის საუკეთესო გოლეადორი გახდა.
ეს ყველაფერი მოხდა 2024/2025 წლების სეზონში, მაშინ, როდესაც "ლომების" კარს ლუკა გუგეშაშვილი იცავდა. საინტერესოა, რომ ერთი საგოლე პასი "თეთრ-წითლების" ყოფილმა მე-10 ნომერმა სწორედ ქართველი გოლკიპერისგან მიიღო. აღნიშნული ფაქტი დაფიქსირდა საბერძნეთის ლიგის პლეიაუტში, ვოლოსთან შეხვედრაში, რომელიც ხუან ფერანდოს გუნდმა 3:0 მოიგო.
პირველი გოლი გაიტანა 32 წლის თავდამსხმელმა, როგორც აღვნიშნეთ, საქართველოს ნაკრების მეკარის საგოლე გადაცემით. რა მოხდა შემდეგ? ხეფტე გადავიდა პირეოსის ოლიმპიაკოსში, იქიდან განათხოვრების წესით კი კასტილია-ლა მანჩაში. 2026 წლის 14 იანვარს მან ალვარო არბელოას გუნდი ესპანეთის თასიდან გამოაგდო.
