ანსუ ფატი გადავიდა მონაკოში, რაც ნიშნავს იმას, რომ ბარსელონაში 10-ნომრიანი მაისური ვაკანტური გახდა. შემდეგი ათიანი კატალონიელების ისტორიაში იქნება ლამინ იამალი და ამ ფაქტს თავად ახალგაზრდა ვინგერი ორიგინალურად გამოეხმაურა.
ესპანელმა გარემარბმა სოციალურ ქსელში გამოაქვეყნა დიეგო მარადონას, რონალდინიო გაუჩოსა და ლიონელ მესის ფოტოები "ბლაუგრანას" მაისურით. შეგახსენებთ, რომ სამივე ლეგენდა სწორედ 10 ნომრით თამაშობდა. კამპ ნოუს ბინადრების ვინგერმა გააკეთა ერთგვარი მინიშნება, რომ მათი ტრადიციების გამგრძელებელი სწორედ ის იქნება.
ჟოან ლაპორტას კლუბი ახალი ათიანის პრეზენტაციას გეგმავდა უახლოეს დღეებში, თუმცა თავად 17 წლის გარემარბის თხოვნით, ანონსმა 13 ივლისზე გადაიწია. საქმე ისაა, რომ აღნიშნულ დღეს ბარსას მომავალი მე-10 ნომერი გახდება 18 წლის და ახალ ნომერს ის სწორედ იუბილეზე მიიღებს.
