კილიან მბაპემ პარკ დე პრენსზე თავისი ბოლო შეხვედრა ჩაატარა. პარის სენ-ჟერმენის მოწინააღმდეგე იყო ტულუზა, რომელთანაც ლიგა 1-ის ჩემპიონი ანგარიშით 1:3 დამარცხდა. პსჟ-ს მხრიდან ერთადერთი ბურთი სწორედ ფრანგმა ფორვარდმა გაიტანა. შეგახსენებთ, რომ საერთო ჯამში მისი მონაგარი 307 მატჩში 256 ბურთს შეადგენს.
აღსანიშნავია, რომ პარიზელთა ლიდერის მიმართ საფრანგეთის დედაქალაქში ორაზროვანი დამოკიდებულებაა. მისი სახელის გამოცხადების დროს, "ლურჯ-წითლების" ქომაგების ნაწილმა სტვენა დაიწყო, ასევე დიდი ნაწილი მატჩზე საერთოდ არ მოვიდა. სტადიონზე მოსულმა ფანებმა კი 25 წლის ფორვარდს დაუვიწყარი სანახაობა აჩუქეს.
შეხვედრის დასრულების შემდეგ, კომენტარი გააკეთა ლუის ენრიკემ, რომელიც თავისი გუნდის მეშვიდე ნომერს ასევე დაემშვიდობა:
"მბაპესთან მუშაობა სასიამოვნო იყო. ის არის იდეალური მოთამაშე, ყველა მხრივ სამაგალითო. მის შესახებ ცუდს ვერაფერს ვიტყვი", - განაცხადა ესპანელმა სპეციალისტმა.
კილიანი პარკ დე პრენსს კლუბის ისტორიაში ყველა დროის საუკეთესო ბომბარდირის სახელით ტოვებს. მასთან ერთად, ფრანგულმა გუნდმა ლიგა 1-ის ჩემპიონობა 6-ჯერ იზეიმა. როგორც ვიცით, პარის სენ-ჟერმენის ლიდერის შემდეგი გაჩერება მადრიდის რეალი იქნება.
გთავაზობთ მისი გაცილების კადრებს
