რექსემმა უმოკლეს დროში მოახერხა ინგლისის მეხუთე დივიზიონიდან მესამეში ამოსვლა. კლუბის ვარსკვლავური მეპატრონეები, რაიან რეინოლდსი და რობ მაკელჰენი ხმაურიან სატრანსფერო ზაფხულს გვპირდებიან. აქტუალურ ვარიანტად რჩება გარეტ ბეილის ფეხბურთში დაბრუნება, რომელმაც კარიერა გასულ წელს დაასრულა.
ყველაფერი დაიწყო მას შემდეგ, რაც უელსური კლუბის მეოთხე დივიზიონში აღზევების შემდეგ, მადრიდის რეალის ყოფილმა გარემარბმა მილოცვა ჩაწერა. იმის შემდეგ, ყოფილ უელსელ ვინგერს "დრაკონების" სახელს პერიოდულად უკავშირებენ. ცოტა ხნის წინ, მაკელჰენმა ღიად ისაუბრა ვეტერანის შესაძლო გადმოსვლის შესახებ:
"ბეილი ტექნიკურად ჯერ კიდევ ხელმისაწვდომია. მას ვესაუბრე ერთი წლის წინ და მინდა ვთქვა, რომ ჩემი წინადადება ჯერ კიდევ ძალაშია. მას ნებისმიერ დროს შეეძლება გოლფის თამაში, მთავარია ვარჯიშებზე მოვიდეს. ჯერ კიდევ გვაქვს დრო გარეტის დასარწმუნებლად", - განაცხადა ამერიკელმა მსახიობმა.
