"ბორჯღალოსნები" 2025 წლის ზაფხულის დასკვნითი ტესტ-მატჩისთვის ემზადებიან. საქართველოს მორაგბეთა ნაკრები 19 ივლისს მბომბელაში, მასპინძელ სამხრეთ აფრიკას ეთამაშება. მსოფლიოს ოთხგზის, მოქმედ ჩემპიონთან და რეიტინგის პირველ ნომერთან შეხვედრა თბილისის დროით, 19:10 საათზე დაიწყება.
2024 წლის 11 ნოემბრიდან სამხრეთ აფრიკა მსოფლიო რეიტინგის უცვლელი ლიდერია. 2025 წლის ზაფხულში სამხრეთ აფრიკამ სამი თამაში ჩაატარა და სამივეში გაიმარჯვა, ჯერ ბარბაროსებს სძლია 54:7, შემდეგ კი იტალიას ორჯერ მოუგო - 42:24 და 45:0.
არსებობის ისტორიაში ბორჯღალოსნებს სამხრეთ აფრიკის წინააღმდეგ ორჯერ უთამაშია. 2003 წლის, საქართველოსთვის პირველ მსოფლიო თასზე, „ბოკემ“ სიდნეიში 46:19 გაიმარჯვა. აღნიშნულ მატჩში "ბორჯღალსონებმა" მსოფლიო თასზე პირველი ლელო დადეს, რომელიც დავით დადუნაშვილის ანგარიშზეა. ერთი გარდასახვა და სამი ჯარიმა გაიტანა პალიკო ჯიმშელაძემ, კიდევ ერთი ჯარიმა კი მეკო კვირიკაშვილმა.
18 წლის შემდეგ სამხრეთ აფრიკამ "ბორჯღალოსნები" ტესტ-მატჩისთვის მიიწვია, 2021 წლის ივლისში მასპინძლებმა პრეტორიაში 40:9 გაიმარჯვეს. ერთი კვირის თავზე გუნდებს შორის მეორე ტესტ-მატჩიც უნდა გამართულიყო, თუმცა ორივე გუნდში კოვიდ ინფექციის გამო პრობლემები შეიქმნა და თამაში გაუქმდა.
