ბოლო საათებში გავრცელებული ინფორმაციის თანახმად, ჩაბი ალონსო და რეალ მადრიდი შეთანხმებასთან ძალიან ახლოს არიან და თუ ყველაფერი გეგმის მიხედვით წავა, ესპანელი სპეციალისტი სეზონის დასრულების შემდეგ სამეფო კლუბს ჩაიბარებს! ალონსოსა და მადრიდულ გრანდს შორის წინასწარი სიტყვიერი შეთანხმება უკვე არსებობს, ახლა კი დარჩენილია კონტრაქტის ბოლო დეტალების შეთანხმება.
ლევერკუზენში მოლოდინის რეჟიმში არიან — გერმანულ კლუბში იციან, რომ ჩაბი სეზონის ბოლოს გუნდს დატოვებს და მადრიდში გადაბარგდება. ბუნდესლიგის დასრულებამდე სულ რაღაც 3 ტურია დარჩენილი, რის შემდეგაც ალონსო ლევერკუზენს დატოვებს და სამწვრთნელო კარიერას რეალში გააგრძელებს.
როგორც უკვე გუშინ გაცნობეთ, კარლო ანჩელოტის მომავალი გადაწყვეტილია. იტალიელი სპეციალისტი რეალს ლა ლიგის მიმდინარე სეზონის დასრულების შემდეგ დატოვებს და ბრაზილიის ეროვნული ნაკრების მთავარი მწვრთნელი გახდება. სამეფო კლუბში დიდი ცვლილებებისთვის ემზადებიან.
