ჩელსიში ახალი სეზონისთვის მზადებას უკვე შეუდგნენ. კონფერენს ლიგის მოგების შემდეგ, ლონდონური კლუბი თავიდან ბოლომდე სატრანსფერო ფანჯარაზე გადაერთო და პირველი გარიგებაც დახურა. ლიამ დელაპი იფსვიჩიდან კარიერას სტემფორდ ბრიჯზე გააგრძელებს.
როგორც ცნობილია, კლუბს საკმაოდ ბევრი ფეხბურთელი დატოვებს, შესაბამისად, ჩელსის წინ დატვირთული ზაფხულის სატრანსფერო ფანჯარა ელოდება. ენცო მარესკას რამდენიმე პოზიციის გაძლიერება სურს და ერთ-ერთი პრიორიტეტი ახალი ვინგერის დამატება იქნება. ამ დრომდე უცნობია რა ბედი ელის მიხაილო მუდრიკს, რომელიც დოპინგ სკანდალშია გახვეული, შესაბამისად, კლუბში მის შემცვლელს უკვე ეძებენ, #1 სამიზნე კი ცნობილია.
ჩელსი ჯეიმი გიტენსის ტრანსფერზე მუშაობს! ლონდონური კლუბი უკვე რამდენიმე კვირაა დორტმუნდთან მოლაპარაკებებს აწარმოებს. კლუბის სურვილია, ტრანსფერი მსოფლიოს საკლუბო ჩემპიონატის დაწყებამდე დაიხუროს. როგორც ცნობილი ხდება, 20 წლის ინგლისელ ვინგერს კარიერის ჩელსიში გაგრძელება სურს და ამ ტრანსფერის წინააღმდეგი არ არის.
ჯეიმი გიტენსი სწორედ ჩელსის აკადემიის აღზრდილია, საიდანაც 2018 წელს მანჩესტერ სიტიში გაბარდგა. ინგლისელი შემტევი ფეხბურთელი 2020 წლიდან უკვე დორტმუნდის ღირსებას იცავს. გიტენსმა ამ დროში 106 მატჩის ჩატარება მოასწრო, გაიტანა 17 გოლი და 14 საგოლე გადაცემითაც გამოიჩინა თავი.
დორტმუნდი ახალგაზრდა ვინგერს დაახლოებით £50-60 მილიონად აფასებს. ჯეიმი გიტენსის ჩელსიში პოტენციურ ტრანსფერთან დაკავშირებით უფრო მეტი ინფორმაცია უახლოეს დღეებში გახდება ცნობილი.
