"გუნდის შედეგით უკმაყოფილო ვარ, თუმცა კაკუტას მიმართ პრეტენზიები არ მაქვს. დღევანდელ შეხვედრაში ის ჩელსის ერთადერთი ნათელი წერტილი იყო. გაელი ძალიან ნიჭიერია, ლონდონური კლუბის მომავალი სწორედ ის არის", - აცხადებდა 65 წლის სპეციალისტი გასული დეკადის დასაწყისში.
ანჩელოტის პროგნოზი არ ახდა - "არისტოკრატებში" სულ რაღაც 16 შეხვედრის ჩატარების შემდეგ, ფრანგი შემტევი ახალი თავგადასავლების საძიებლად გაეშურა. "ლურჯების" ყოფილმა ვინგერმა გამოიცვალა 15 კლუბი, მაგრამ უშედეგოდ. 2012-2014 წლებში ის თამაშობდა არნემის ვიტესშიც, გურამ კაშიას გვერდით.
33 წლის შემტევის ბოლო გაჩერება იყო ირანული ესტეგლალი, რომელშიც მან მხოლოდ 11 შეხვედრა ჩაატარა. დღეს, ის უკვე უგუნდოდ არის. შეგახსენებთ იმასაც, რომ 2010 წელს, კაკუტა გახდა 19-წლამდელთა ევროპის ჩემპიონი და ტურნირის საუკეთესო მოთამაშეც.
