სერია ა-ს უკანასკნელ ტურში ნაპოლი საკუთარ კედლებში კალიარის მიიღებს. გამარჯვების შემთხვევაში, იტალიის სამგზის ჩემპიონი თავის კოლექციაში კიდევ ერთ სკუდეტოს ჩაიწერს. საინტერესოა, რომ სარდინიელთა შემადგენლობაში თამაშობს ფეხბურთელი, რომელიც იმყოფება "პარტენოპეის" საკუთრებაში და მისი ამჟამინდელი გუნდის წაგების შემთხვევაში, ჩემპიონობა მასაც ჩაეთვლება.
საუბარია ელია კაპრილეზე, რომელმაც სეზონის პირველ ნახევარში სერია ა-ში "აძურის" რიგებში ჩაატარა ოთხი მატჩი, ზამთარში კი ის იჯარით "როსობლუში" გადავიდა. იტალიელი გოლკიპერი ახალ კლუბში გახდა ძირითადი შემადგენლობის წევრი და მან 12 შეხვედრის ჩატარებაც მოასწრო.
როგორც ვხედავთ, დიეგო მარადონას ბინადრების საკუთრებაში მყოფი მეკარე დილემის წინაშე დგას. რაც შეეხება დავიდე ნიკოლას გუნდის პოზიციას, საკმაოდ მაღალია იმის ალბათობა, რომ 23 წლის გოლკიპერი სათადარიგოთა სკამზე დატოვონ. ფაქტია, რომ უნიპოლ დომუსის ბინადრების სავარაუდო შემადგენლობაში მათი გუნდის 25-ე ნომერი არ ფიგურირებს.
კაპრილეს სასტარტო თერთმეტეულში არყოფნა განპირობებულია ტრავმით - ასეთია კალიარის პოზიცია, თუმცა ეს გარემოება ბევრ კითხვას იწვევს. შეგახსენებთ იმასაც, რომ იმ შემთხვევაში, თუ ანტონიო კონტეს გუნდი კვლავ დაკარგავს ქულებს, პარალელურ შეხვედრაში კი მილანის ინტერი მოუგებს კომოს, იტალიელი გოლკიპერი ჩემპიონი ვერ გახდება.
