ჩემპიონთა ლიგის ნახევარფინალის ფარგლებში ბაიერნ მიუნხენი პარის სენ-ჟერმენს ესტუმრება. განვიხილოთ, თუ რას უნდა ველოდოთ აღნიშნული შეხვედრისგან.
პსჟ V ბაიერნი | 23:00
ერთმანეთისთვის კარგად ნაცნობი მეტოქეები, რომლებიც 15-ჯერ შეხვდნენ ჩემპიონთა ლიგაზე, ერთხელ კი საკლუბო მსოფლიო ჩემპიონატის ფინალში. ის დუელი მოიგო პარის სენ-ჟერმენმა, ევროპის მთავარ საკლუბო ტურნირზე კი უპირატესობა არის ბაიერნის მხარეს: 9 გამარჯვება, თანაც ზედიზედ 5 უკანასკნელ შეხვედრებში.
მიუნხენელებს პსჟ დაუმარცხებიათ ჩემპიონთა ლიგის გასულ სეზონშიც, როდესაც ფრანგული გუნდი თავისი პირველი ისტორიული ტიტულისკენ მიმავალ გზაზე იყო. ასევე მიმდინარე სეზონშიც, როცა "ლურჯ-წითლები" უკვე მოქმედ ჩემპიონთა რანგშიც იყვნენ. მოკლედ, ლუის ენრიკეს შეგირდებს ნავსი აქვთ გასატეხი.
რაც შეეხება დღევანდელ მატჩს, "რეკორდმაისტერი" ნახევარფინალურ დაპირისპირებას ხვდება ძალიან კარგი განწყობით - ბუნდესლიგის ტიტული უკვე გაფორმებულია. თავიანთ ლიგას ლიდერობენ პარკ დე პრენსის მკვიდრებიც, მაგრამ საფრანგეთის პირველობაში საჩემპიონო ინტრიგა ჯერ კიდევ ცოცხალია.
ალიანც არენას ბინადრებთან მატჩში მოსალოდნელია ხვიჩა კვარაცხელიას სასტარტოში გამოჩენა, ზოგადად კი პარის სენ-ჟერმენის შემადგენლობა ოპტიმალურია, დანაკლისი პრაქტიკულად არ არის. ვენსან კომპანის ამ მხრივ გაუმართლა ნაკლებად, პსჟ-სთან შეხვედრას გამოტოვებენ სერჟ გნაბრი, რაფაელ გერეირო, სვენ ულრაიხი, ლენარტ კარლი და კიდევ რამდენიმე ახალგაზრდა მოთამაშე.
შეგახსენებთ იმასაც, რომ ბაიერნსა და "ლურჯ-წითლებს" შორის გამარჯვებული ჩემპიონთა ლიგის ფინალში მადრიდის ატლეტიკოსა და ლონდონის არსენალს შორის ერთ-ერთს შეხვდება. საპასუხო დუელი მიუნხელებსა და ენრიკეს შეგირდებს შორის 6 მაისს შედგება.
