დღეს გაიმართება ჩემპიონთა ლიგის მეოთხედფინალის ორი განმეორებითი მატჩი - ლივერპული მიიღებს პარის სენ-ჟერმენს, ბარსელონა კი მადრიდში ატლეტიკოს ესტუმრება. განვიხილოთ, თუ რას უნდა ველოდოთ აღნიშნული შეხვედრებისგან.
ლივერპული V პარის სენ-ჟერმენი (0:2) | 23:00
ამ გუნდების პირველი მატჩი დასრულდა პარის სენ-ჟერმენის გამარჯვებით, ანგარიშით 2:0. ჩემპიონთა ლიგის მოქმედი ტრიუმფატორების მხრიდან გიორგი მამარდაშვილის კარი ხვიჩა კვარაცხელიამ და დეზირე დუემ აიღეს. აღნიშნული შეხვედრის საუკეთესო მოთამაშე სწორედ ქართველი ვინგერი გახდა.
ორი გოლის გაშვების მიუხედავად, დადებითად შეფასდა ლივერპულის მეკარის თამაშიც, რადგან მან ოთხი სეივი განახორციელა. ახალგაზრდა ქართველ გოლკიპერზე მაღალი შეფასება (6.9) მერსისაიდელთა მხრიდან მხოლოდ ფლო ვირცმა მიიღო (7.0). როგორც ვხედავთ, 1/2 ფინალში გასვლისთვის "წითლებს" 3-ბურთიანი სხვაობით მოგება სჭირდებათ.
რაც შეეხება დანაკლისს, ენფილდის ბინადრების განკარგულებაში არ იქნებიან ალისონ ბეკერი, ვატარუ ენდო, კონორ ბრედლი, ჯოვანი ლეონი და სტეფან ბაჟეტიჩი. ასევე საეჭვოა კურტის ჯონსის გამოჩენაც. პსჟ-ს კი ფაბიან რუისი და კუენტინ ნჯანტუ ვერ დაეხმარებიან. აქვე დავამატებთ, არნე სლოტის გუნდსა და "ლურჯ-წითლებს" შორის მოგებული 1/2 ფინალში მადრიდის რეალსა და მიუნხენის ბაიერნს შორის ერთ-ერთს შეხვდება.
ეს იქნება ამ გუნდების რიგით მერვე მატჩი და იქამდე, ოთხჯერ იმარჯვეს პარკ დე პრენსის ბინადრებმა, სამჯერ კი ლივერპულის ფეხბურთელებმა. როგორც ვხედავთ, მერსისაიდელებსა და პარის სენ-ჟერმენს შორის არასდროს დაფიქსირებულა ფრე, ჯეიმს მილნერი კი რჩება ერთადერთ მოთამაშედ, რომელმაც აღნიშნულ დუელში 1-ზე მეტი ბურთის გატანა შეძლო.
ატლეტიკო V ბარსელონა (2:0) | 23:00
ამ გუნდების პირველი მატჩი დასრულდა ატლეტიკოს გამარჯვებით, ანგარიშით 2:0. ბარსელონას პრობლემები დაიწყო პირველი ტაიმის მიწურულს, როცა ჯერ პაუ კუბარსიმ მიიღო წითელი ბარათი, შემდეგ კი ხულიან ალვარესმა ულამაზესი ჯარიმა შეაგდო. მე-2 ნახევარში ალექსანდერ სორლოთმა მადრიდელთა უპირატესობა 2-ბურთამდე გაზარდა.
კატალონიური გუნდი დგას ურთულესი ამოცანის წინაშე - გამარჯვება მინიმუმ სამი გოლით, თანაც "როხიბლანკოსის" მოედანზე. "ბლაუგრანას" მდგომარეობას ამძიმებს რაფინია ბელოლის ტრავმაც, დიეგო სიმეონეს გუნდის ლაზარეთი კი პრაქტიკულად ცარიელია, მხოლოდ ხოსე მარია ხიმენესის თამაშია საეჭვო.
კამპ ნოუს ბინადრებსა და ატლეტიკოს შორის გამარჯვებული ჩემპიონთა ლიგის ნახევარფინალში ლონდონის არსენალსა და ლისაბონის სპორტინგს შორის ერთ-ერთს დაუპირისპირდება. ეს იქნება ბარსასა და მადრიდელების რიგით მე-6 შეხვედრა მიმდინარე სეზონში, ზოგადად კი 252-ე.
115-ჯერ იმარჯვა კატალონიურმა გუნდმა, 79-ჯერ - "როხიბლანკოსმა", 57 მატჩი ფრედ დასრულდა. რაც შეეხება უშუალოდ ჩემპიონთა ლიგაზე მომხდარ დუელებს, "ბლაუგრანა" სიმეონეს გუნდთან გამოვარდა 2-ჯერ, 2013/14-სა და 2015/16-ის სეზონების 1/4 ფინალებში. როგორც ვხედავთ, მეტროპოლიტანოს მკვიდრები ძალიან ახლოს 3/3-თან არიან.
