მადრიდის რეალი - მანჩესტერ სიტი
ბევრის აზრით, ნაადრევი ფინალი ან მთავარი ფავორიტების დაპირისპირება. ობიექტურად, სხვებზე მაღლა სწორედ ეს ორი გუნდი დგას. რეალს ჩემპიონთა ლიგაზე ყოველთვის აქვს სულ სხვა მაგია და ამასთან ერთად, თამაშის ხარისხითაც, ეს გუნდი წელს ძალიან კარგია. მადრიდელები სამეფო ტახტს მარტივად არავის დაუთმობენ.
რაც შეეხება მან. სიტის, ჩემპიონთა ლიგის მოქმედი ტრიუმფატორი, რომელიც ზუსტად იმავე ფორმულით ცდილობს ტიტულის დაცვას, როგორც შარშან. მანჩესტერელები მინიმუმ არ შესუსტებულან. ამ წყვილს შორის რევანშიც აღების საკითხიც არსებობს, როგორც გვახსოვს, ერთი წლის წინ, 1/2 ფინალში "ქალაქელებმა" "სამეფო კლუბი" 4:0 გაანადგურეს.
ზოგადადაც, ურთიერთშეხვედრების ისტორია "ლურჯებისკენ" იხრება. 10 მატჩი - ოთხჯერ იმარჯვეს ინგლისელებმა, სამჯერ "ბლანკოსმა", სამი თამაშიც ფრედ დასრულდა. ცალკე გამოსარჩევია კარლო ანჩელოტისა და პეპ გვარდიოლას დუელი. ტიტულების მომგები ტიტანები, რომლებმაც სხვებზე უკეთ იციან, თუ რას ნიშნავს ჩემპიონთა ლიგის თასის აღმართვა.
კიდევ ერთი საინტერესო საკითხი - ერლინგ ჰოლანდისა და ჯუდ ბელინგემის დაპირისპირება. ყოფილი თანაგუნდელები დორტმუნდში, დღეს კი თავიანთი გუნდების ერთ-ერთი ლიდერები. არსებობს მოსაზრება, რომ ფეხბურთის მომავალი კილიან მბაპეს, ნორვეგიელი ფორვარდისა და ინგლისელი გამთამაშებლის ხელშია. შეიძლება ითქვას, რომ ოქროს ბურთის პოტენციური მფლობელების დუელი გველის.
პარის სენ-ჟერმენი - ბარსელონა
ძველი მეგობრები/მოწინააღმდეგეები, რომლებსაც ერთმანეთთან ძალიან ბევრი რამ აკავშირებთ. რთული სათქმელია, მიიჩნევა თუ არა პარის სენ-ჟერმენი ფავორიტად. პსჟ-ს ჰყოლია უფრო ვარსკვლავური შემადგენლობაც, მაგრამ ამ კლუბის ევროპული თავგადასავალი ყოველთვის ფიასკოთი სრულდებოდა.
წელს, პარიზში აქცენტი გადატანილია არა აწმყოსა და წარსულის ხმამაღალ სახელებზე, არამედ პერსპექტიულ ახალგაზრდებზე. ამ პროცესს მართავს ყოფილი ბარსელონელი, ლუის ენრიკე, რომლის გუნდის ლიდერად კილიან მბაპე რჩება. ანჩელოტის გუნდში გადასვლამდე, ის კიდევ ერთხელ გადაიმეორებს, თუ რას ნიშნავს კატალონიელების წინააღმდეგ თამაში.
"ბლაუგრანა" არ მოიაზრება ფავორიტად, თუმცა ამ გუნდს ნაადრევად არავინ ემშვიდობება. ჩემპიონთა ლიგას თუ დოღს შევადარებთ, შეიძლება ითქვას, რომ საქმე ჩრდილში მყოფ ცხენთან გვაქვს. დიახ, "ლურჯ-ბროწეულისფრებს" ფავორიტის სტატუსით გამოწვეული ზეწოლა არ შეაწუხებთ. ისინი მშვიდად ეცდებიან საქმის ბოლომდე მიყვანას.
ამ გუნდების ურთიერთშეხვედრების ისტორია მართლაც მდიდარია. 13 მატჩი - ხუთჯერ იმარჯვეს კამპ ნოუს ბინადრებმა, ოთხჯერ "ლურჯ-წითლებმა", ოთხი თამაშიც ფრედ დასრულდა. ყველას გვახსოვს ბარსას ეპოქალური 6:1 და 4 წლის შემდეგ, მბაპეს სოლო კონცერტად ქცეული 4:1-იც. ერთი სიტყვით, გასახსენებელი ბევრია.
კიდევ ერთი საინტერესო დეტალი - რონალდინიო გაუჩო, ლიონელ მესი, ზლატან იბრაჰიმოვიჩი, დანი ალვეში, ნეიმარ ჟუნიორი, ეპოქალური ფეხბურთელები, რომელთა კარიერულმა გზამ სხვადასხვა დროს სწორედ კატალონიასა და პარკ დე პრენსზე გაიარა. საინტერესოა, რომელი კლუბის მხარეს იქნებიან აღნიშნული ლეგენდები...
ლონდონის არსენალი - მიუნხენის ბაიერნი
ამ წყვილში ერთი გუნდი იბრძვის შიდა ჩემპიონობისთვის, მეორე კი ლიდერს 10 ქულით ჩამორჩება. სხვა, ნებისმიერ სეზონში, ჩემპიონობის პრეტენდენტად ვივარაუდებდით ბაიერნს, მდევარი კი სავარაუდოდ არსენალი იქნებოდა, მაგრამ წელს ყველაფერი პირიქითაა. ინგლისის პირველობის საჩემპიონო რბოლაში, პრაქტიკულად, სამხელისუფლებიანობაა, გვარდიოლას გუნდსა და ლივერპულთან ერთად, ოქროზე პრეტენზიას ლონდონელებიც აცხადებენ.
მიუნხენელებმა კი ლევერკუზენის ბაიერის ტრიუმფალურ სვლას უბრალოდ ვერაფერი დაუპირისპირეს. "მეთოფეები" წელს თავიანთ საუკეთესო ფეხბურთს თამაშობენ, რასაც ვერ ვიტყვით "რეკორდმაისტერზე" და აქედან გამომდინარე, რთულია ფავორიტის დასახელება. ვინ იცის, იქნებ "კანონირების" რევანშის დროც მოვიდა.
შურისძიების სურვილი კი ემირეითსის ბინადრებს ნამდვილად ამოძრავებთ. თავად განსაჯეთ, ამ გუნდების ბოლო სამ შეხვედრაში ანგარიში 5:1 დაფიქსირდა და სამივე შემთხვევაში გამანადგურებლის როლში ბავარია იყო. ზოგადად კი ამ გუნდების ურთიერთმატჩების ისტორია 12 თამაშს მოიცავს. 7 მოგება არის ალიანც არენას ბინადრების ანგარიშზე, მხოლოდ 3 კი არსენალის, 2 შემთხვევაში ფრე დაფიქსირდა.
მადრიდის ატლეტიკო - დორტმუნდის ბორუსია
ნაკლებად ხმაურიანი აფიშა, რომელზეც ფავორიტის სტატუსი ატლეტიკოსკენ იხრება. უნდა ითქვას, რომ ეს ყველაფერი სრულიად დამსახურებულია, იმის გათვალისწინებით, თუ რომელი კლუბი როგორ გამოთიშეს ასპარეზობას მადრიდელებმა. საუბარია მილანის ინტერის შესახებ, რომელიც 1/8 ფინალის საპასუხო მატჩამდე ტურნირის ფავორიტად მოიაზრებოდა.
იქ, სადაც ახსენებდნენ სანტიაგო ბერნაბეუსა და ეტიჰადის ბინადრებს, "ნერაძურიც" აუცილებლად ფიგურირებდა. "როხიბლანკომ" დაჯაბნა სერია ა-ს ლიდერი და ბევრს გაახსენდა ამ გუნდის 4 წლის წინანდელი დაპირისპირება მერსისაიდელებთან, როდესაც დამატებულ დროში მიწაზე კიდევ ერთი ფავორიტი დაენარცხა.
რაც შეეხება დორტმუნდს, ამ გუნდმა მერვედფინალში არც თუ ისე მარტივად დაამარცხა პსვ ეინდჰოვენი, რაც ობიექტურად, მრავლის მთქმელი ნამდვილად არ არის. ბორუსიას ხელს მხოლოდ ურთიერთმატჩების ისტორია უწყობს. 6 თამაშში - 3 მოგება გერმანელების ანგარიშზეა, 2 კი - "ინდიელების", ერთ შემთხვევაში ფრე დაფიქსირდა.
