ჩემპიონთა ლიგის 2025/2026 წლების სეზონს ეყოლება ორი საკმაოდ საინტერესო დებიუტანტი - ალმათის ქაირათი და პაფოსი. ორივე კლუბმა ბოლო წლებში მიაღწია დიდ პროგრესს, განსაკუთრებით ეს ითქმის "ზღვისპირელებზე", რომლებიც როგორც კლუბი საერთოდ 2014 წელს დაარსდნენ.
რა გზა გამოიარეს "ლურჯ-თეთრებმა" ამ 11 წელიწადში? 2023/2024 წლებში ისინი დაეუფლნენ კვიპროსის თასს და მოხვდნენ კონფერენს ლიგის ფაზაში, ერთი წლის შემდეგ კი ჩემპიონობა და ევროპის მთავარი საკლუბო ტურნირის საგზური! უდავოდ, საქმე გვაქვს კვიპროსის ყველაზე სწრაფად პროგრესირებად კლუბთან.
საინტერესოა, რომ სტელიოს კირიაკიდესის სახელობის არენაზე სხვადასხვა დროს უთამაშია ექვს ქართველ ლეგიონერს - გია გრიგალავას, ნიკოლოზ გელაშვილს, როინ კვასხვაძეს, ელგუჯა გრიგალაშვილს, ლევან ხარაბაძესა და ლევან ხმალაძეს. საუბარია მოთამაშეებზე, რომლებიც საქართველოს ეროვნული გუნდის რეგულარული წევრები არასდროს ყოფილან.
ამ ფაქტიდანაც შეგვიძლია დავასკვნათ, თუ რამხელა პროგრესს მიაღწია პაფოსმა გასული დეკადის შუა პერიოდიდან - დღემდე. რაც შეეხება ევროპის მთავარი საკლუბო ტურნირის მე-2 დებიუტანტს, მას ბევრად მდიდარი ისტორია აქვს. "შავ-ყვითლები" სსრკ-ს ჩემპიონატში რეგულარულად გამოდიოდნენ.
ცნობისთვის, ორტალიკ სტადიონის ბინადრებმა თბილისის დინამო 43 მატჩში მხოლოდ 6-ჯერ დაამარცხეს. მივადექით ევროსარბიელს, სადაც ქაირათის მთავარი მიღწევა აქამდე ფიქსირდებოდა 2021/22 წლების სეზონით, როდესაც ეს კლუბი კონფერენს ლიგის ჯგუფურ ეტაპზე მოხვდა.
გავიდა რამდენიმე წელი და ალმათელებს უკვე ჩემპიონთა ლიგაზე ვიხილავთ. შეგახსენებთ იმასაც, რომ ამ გუნდის მთავარ მწვრთნელი 2016 - 2017 წლებში იყო კახაბერ ცხადაძე, რომელმაც "შავ-ყვითლებს" ყაზახეთის 2 სუპერ თასი მოაგებინა. რაც შეეხებათ ქართველ ლეგიონერებს, ორტალიკზე ახლაც თამაშობენ გიორგი ზარია და ლუკა გადრანი.
მათ გარდა, ქაირათში შორეულ 1960-იან წლებში როლანდ კიზირიაც ირიცხებოდა. არ უნდა დაგვავიწყდეს ქართული ფესვების მქონე ევსტაფი ფეხლევანიდი, რომელიც არის ალმათური კლუბის ყველა დროის საუკეთესო გოლეადორი და ბევრის აზრით, საუკეთესო მოთამაშეც.
