ეროვნული ლიგის 30-ე ტურის ცენტრალურ მატჩში იბერია გორის დილას დაუპირისპირდა და დაძაბულ ბრძოლაში 2:1 დაამარცხა.
მატჩის გმირი იბერიას 25 წლის მარცხენა მცველი ჯემალ ჯინჯოლავა გახდა, რომელმაც ორი ერთმანეთზე ლამაზი გოლი გაიტანა.
ჯინჯოლავამ ჯერ შორეული გასროლა შემოგვთავაზა, შემდეგ კი კუთხურიდან ჩაახვია და იბერიას უმნიშვნელოვანესი 3 ქულა მოუტანა.
მაისის თვეში, ჯინჯოლავა საოცარ ფორმაში იყო და როგორც ჩვენთვის არის ცნობილი, ივნისის მატჩებისთვის ეროვნულ ნაკრებშიც იძახებდნენ, თუმცა გარეჯთან მატჩში მძიმე ტრავმა მიიღო და 5 თვე გაუცდა.
5 თვის შემდეგ დაბრუნებული ჯინჯოლავა თამაშში ჯერ შეცვლიდან ერთვებოდა ხოლმე, ახლა კი ფორმა სრულფასოვნად აღიდგინა და კვლავ გუნდის ერთ-ერთ ლიდერად იქცა.
იმის გათვალისწინებით, რომ საქართველოს ნაკრებში მარცხენა მცველის პოზიცია პრობლემატურია და ძირითად შემთხვევაში ამ პოზიციაზე ნომინალური მარცხენა მცველი არასდროს არ დგას ხოლმე, ჯინჯოლავა ერთ-ერთი ის კადრია, რომელიც ნაკრებს სჭირდება და გამოადგება.
ჯინჯოლავა ბურთთან კარგადაა, კომბინაციურ ფეხბურთს იდეალურად ერგება, აქვს კარგი დარტყმა და ყოველწლიურად მისი პროგრესი ცალსახაა. თავიდან მან კარიერა ცენტრალური მცველის პოზიციაზე დაიწყო, ახლა კი მარცხენა მცველად წარმატებით გადაეწყო.
ჯინჯოლავას დუბლი დილას წინააღმდეგ
