როგორც მოგეხსენებათ, მილანის ინტერისა და მადრიდის ატლეტიკოს პირველ მერვედფინალურ შეხვედრაში, ანტუან გრიზმანმა კოჭის ტრავმა მიიღო. ფრანგმა ფორვარდმა ესპანეთის ჩემპიონატის რამდენიმე მატჩი გამოტოვა, კითხვის ნიშნის ქვეშ იდგა მისი მონაწილეობა "ნერაძურისთან" საპასუხო დაპირისპირებაშიც.
"როხიბლანკოს" გულშემატკივრებისთვის სასიხარულო ამბავია ის, რომ საფრანგეთის ნაკრების თავდამსხმელი სრულად გამოჯანმრთელდა. "ინდიელთა" 7-იანი "შავ-ლურჯებთან" მატჩისთვის მწყობრში იქნება და არაა გამორიცხული, რომ ის მოედანზე უფრო ადრეც ვიხილოთ. დიეგო სიმეონეს გუნდის უახლოესი მეტოქე კადისი იქნება.
შეხვედრა გაიმართება შაბათს, 9 მარტს. სიმონე ინძაგის გუნდი კი მეტროპილიტანოს 13 მარტს ესტუმრება. აქვე დავამატებთ, რომ 32 წლის თავდამსხმელმა ატლეტიკოს მაისურით გატანილი გოლების რაოდენობით, გადაასწრო ლუის არაგონესს, რითაც ის კლუბის ისტორიაში ყველა დროის საუკეთესო ბომბარდირი გახდა. გრიზმანის ანგარიშზე 175 გატანილი ბურთია.
