როგორც კვარაცხელიას აგენტმა, მამუკა ჯუღელმა ჩვენთან საუბარში აღნიშნა, პსჟ კვარაცხელიას შესაძენად მზადაა და გადაწყვეტილება დე ლაურენტისმა უნდა მიიღოს. წინასწარი ინფორმაციით, პარიზელები 100 მილიონი ევროს გადახდას აპირებენ.
ყველაფერი ევროპის ჩემპიონატის დაწყებამედე უნდა გაირკვეს. ეს იქნება ყველაზე ხმაურიანი ტრანსფერი ქართული ფეხბურთის ისტორიაში, რომელსაც თავისი დადებითი და უარყოფითი მხარეები აქვს.
დადებითი ის არის, რომ ქართველში 100 მილიონის გადახდა უპრეცედენტო შემთხვევაა და კვარაცხელიას მსოფლიოს ერთ-ერთ საუკეთესო გუნდში ითამაშებს. მით უმეტეს, ის პსჟ-ში მსოფლიოს საუკეთესო ფეხბურთელის, კილიან მბაპეს შემცვლელად მიდის. ასე მივიდა ის ნაპოლიში ლორენცო ინსინიეს შემცვლელად და 1 წელიწადში, მასზე დიდი გახდა.
კვარაცხელიას გაეზრდება ჩემპიონთა ლიგისა და ოქროს ბურთის მოგების შანსები. ბოლო წლებში, პსჟ ჩემპიონთა ლიგაზე ან ფინალში გადის, ან ნახევარფინალში, თუმცა ეს სანუკვარი ტიტული ჯერ არ მოუგიათ. კვარაცხელია იმუშავებს ისეთ დიდ მწვრთნელთან, როგორიც ლუის ენრიკეა და მასთან უფრო განვითარდება.
რთულია, როცა პსჟ-ში გადადიხარ და შენს სანაცვლოდ 100 მილიონს იხდიან, რამე უარყოფითი იპოვო, თუმცა საფეხბურთო თვალსაზრისით, კვარაცხელია შედარებით დაბალი დონის ლიგაში ითამაშებს. სერია ა-ში კვარას სულ ტოპ გუნდებთან უწევდა თამაში, საფრანგეთის ლიგა 1-ში კი პსჟ ზედმეტად დომინანტია და ყველაზე 10 თავით მაღლა დგას. ისეთი გუნდიც არ არის, რომელიც დედაქალაქელებს წინააღმდეგობას გაუწევს და ეს ფაქტი წლიდან წლამდე თვალსაჩინო ხდება.
ამასთანავე, კვარასთვის რთული იქნება კარიერის შემდგომი ნაბიჯის გადადგმა და პსჟ-დან ტოპ ჩემპიონატის ტოპ გუნდში გადასვლა, რადგან პსჟ აქეთ ყიდულობს ტოპ გუნდებიდან ფეხბურთელებს და იშვიათად უშვებს.
ამის მაგალითზე, კილიან მბაპე პსჟ-დან იქამდე არ წავიდა, სანამ კონტრაქტი არ ამოეწურა. პსჟ-სთვის ფეხბურთელის გაყიდვისგან დიდი ფულის მიღება დიდად მათ ინტერესებში არ ჯდება, კვარაცხელია კი პსჟ-სთან მინიმუმ 4-წლიან კონტრაქტს გააფორმებს.
ხვიჩა ნაპოლიდან დღესვე რომ წავიდეს, მაინც ამ გუნდის ლეგენდად და თილისმად დარჩება, რადგან ნაპოლის ნანატრი ტიტული კვარამ თავის პირველივე სეზონში მოაგებინა და გულშემატკივრების საყვარელი ფეხბურთელი გახდა.
წინა სეზონმა აჩვენა, რომ კვარაცხელიასთვის ნაპოლიდან წასვლის და კარიერის ახალ ეტაპზე გადასვლის დროა, ახლა ამის იდეალური შანსია. თუ ეს წელს არ მოხდა, შესაძლოა მომდევნო წლებში ტოპ გრანდში წასვლა უფრო გართულდეს.
