როგორც მოგეხსენებათ, გიორგი მიქაუტაძე ოლიმპიკ ლიონიდან კარიერას ვილიარეალში გააგრძელებს. ძალიან მალე აღნიშნული ტრანსფერი საბოლოოდ გაოფიციალურდება. როგორც ვიცით, "სუბმარინო ამარილო" მიმდინარე სეზონში ევროპის მთავარ საკლუბო ტურნირზე მიიღებს მონაწილეობას.
"ყვითლების" მოწინააღმდეგეები ჩემპიონთა ლიგის ფაზაში იქნებიან მანჩესტერ სიტი, იუვენტუსი, ტოტენჰემი, ლევერკუზენი, დორტმუნდი, აიაქსი, კოპენჰაგენი და პაფოსი. ამ ჩამონათვალის კლუბების მინიმუმ ნახევარს სხვადასხვა დროს სწორედ ქართველ ფორვარდს უკავშირებდნენ.
გარდა ამისა, ერთ-ერთ მათგანში ჟერლანელთა აღზრდილმა თავდამსხმელმა თამაშიც მოასწრო. საუბარია ამსტერდამული გუნდის შესახებ, რომელშიც 24 წლის ფორვარდი ორი სეზონის უკან გადავიდა. როგორც გვახსოვს, "ებრაელთა" შემადგენლობაში თავის დამკვიდრება მან ვერ შეძლო.
"ლომების" 69-ე ნომერმა იოჰან კრუიფ არენაზე ჩაატარა სულ რაღაც ცხრა მატჩი, რის შემდეგაც შუა სეზონში მას მეცში დაბრუნება მოუწია. მიქაუტაძეს არაერთხელ უსაუბრია იმ პრობლემების შესახებ, რომელიც მას დახვდა აიაქსში და ყველაზე მთავარი მათ შორის თავკაცების უნდობლობა იყო.
ქართველმა თავდამსხმელმა მოგვიანებით დაამტკიცა გრუპამა სთეიდიუმზე, "ლე გრენასა" და ნაკრებში, რომ ამსტერდამელებმა მასთან მიმართებაში შეცდომა დაუშვეს. გავიხსენოთ თუნდაც ერთა ლიგის შეხვედრა სომხეთის ეროვნულ გუნდთან, რომელშიც ჟორჟმა მეტოქეს 2 თამაშის ჯამში 4 ბურთი შეუგდო.
როგორც გვახსოვს, "მთიელების" მთავარი მწვრთნელი იმ დროს იყო ჯონ ვან'ტ სხიპი, რომელიც ოლიმპიკ ლიონის თავდამსხმელთან სწორედ "ებრაელებში" მუშაობდა. სერამიკაზე გადასვლის შემდეგ კი 24 წლის ფორვარდის პოტენციალს საკუთარ თავზე გამოცდიან უკვე მთლიანად კრუიფ არენას ბინადრები, თანაც მთავარ საკლუბო ტურნირზე.
