რაც შეეხებათ ლუარელებს, ლიგა 2-ში მესამე ადგილის დაკავების შემდეგ, თავდაპირველად მათ მოუწიათ საპლეიოფო შეხვედრა მეოთხე პოზიციაზე გასულ როდეზთან, რომელთანაც მოგების შემდეგ, ისინი უკვე "ლეს გრენატსზე" გავიდნენ. აქვე დავამატებთ, დაპირისპირება იქნება 2 მატჩიანი, პირველი თამაში გაიმართება დღეს, საპასუხო კი 2 ივნისს.
ცხადია, ყურადღების ცენტრში იქნება "ბროწეულისფერთა" თავდამსხმელი, გიორგი მიქაუტაძე, რომელმაც ამსტერდამის აიაქსიდან დაბრუნების შემდეგ, ნამდვილი ფურორი მოახდინა. ქართველმა ფორვარდმა იანვრის შემდეგ გაიტანა 9 ბურთი და ის ფაქტი, რომ ლასლო ბოლონის გუნდს აქვს საფრანგეთის უმაღლეს დივიზიონში დარჩენის შანსი, გარკვეულწილად მისი დამსახურებაა.
შეიძლება ითქვას, რომ "ლეს ვერტსთან" გამარჯვება საქართველოს ნაკრების თავდამსხმელისთვის იქნება უკანასკნელი მისია, რომლის შემდეგაც ის სენ-სიმფორიენს დატოვებს. 23 წლის ფორვარდს ჰყავს არაერთი მსურველი და ამ დროისთვის ყველაზე ახლოს მის გაფორმებასთან მონაკო არის. ვნახოთ, როგორი იქნება მეცის მე-10 ნომრის ბოლო აკორდი.
"მწვანეების" მთავარი მწვრთნელი, ოლივიე დალ'ოლიო ლოთარინგიელთა მხრიდან ყველაზე მეტად სწორედ მიქაუტაძეს უფრთხის - "მათ ჰყავთ ფეხბურთელი, რომელიც სხვებზე მაღლა დგას. ვგულისხმობ ჟორჟს, რომელმაც საოცარი სეზონის მე-2 ნახევარი შემოგვთავაზა. მას ნებისმიერ მეტოქესთან თამაში შეუძლია და ის უმაღლესი დონის მოთამაშეა", - განაცხადა ფრანგმა დამრიგებელმა.
სენტ-ეტიენი - მეცი
ლიგა 1-ის პლეი-ოფი
30 მაისი, 22:30
ჟოფრუა გიშარი, სენტ-ეტიენი
მთავარი მსაჯი: ბენუა მილო
