დღეს საქართველოს საკალათბურთო ნაკრები ჩვენი ქვეყნის ისტორიაში ზედიზედ მეექვსე ევრობასკეტზე ასპარეზობას დაიწყებს. დღეს თბილისის დროით 16:00 საათზე, ლიმასოლში C ჯგუფის პირველი მატჩი გაიმართება, დღეს ევრობასკეტზე ასპარეზობას ტურნირის მოქმედი ჩემპიონი ესპანეთის ნაკრები იწყებს.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში ტარდება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით შეიკრიბა და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველოს ნაკრები კვიპროსში, მასპინძელ ნაკრებთან, იტალიასთან, ბოსნია და ჰერცეგოვინასთან, ესპანეთთან და საბერძნეთთან ერთად იასპარეზებს.
როგორ ფორმაში ხვდება საქართველო ძლიერ მეტოქესთან მატჩს და რა ხდება მეტექეთა რიგებში?
ამ დრომდე უცნობია ითამაშებს თუ არა საქართველოს ნაკრების კაპიტანი. თორნიკე შენგელიამ შეკრება 9 აგვისტოს არითმიის გამო დატოვა, ბარსელონაში ჩატარებული გამოკვლევების პოზიტიური შედეგის შემდეგ, ნაკრებს 25 აგვისტოს დაუბრუნდა, თორნიკეს თქმით, თავს კარგად გრძნობს და თუ შესაბამის ფორმაში იქნება ითამაშებს.
"თავს კარგად ვგრძნობ, მთავარია რამდენად კარგად მოვახერხებ ფორმაში შესვლას იმ დონემდე რომ გუნდს დავეხმარო, 2 კვირა არაფერი გამიკეთებია, რადგან არ შეიძლებოდა ფიზიკური დატვირთვა. 3 ვარჯიში ჩავატარე სულ და ვნახოთ როგორ შევძლებ გუნდისთვის სარგებლის მოტანას. რაც შეეხება მეტოქეს, ესპანეთი ძლიერი ნაკრებია, ჩვენც გვაქვს ჩვენი ძლიერი მხარეები, შევეცდებით ჩვენ სიძლიერეებზე დავაფუძნოთ თამაშის სტრატეგია,” - განაცხადა შენგელიამ.
შეგახსენებთ, 2022 წელს შენგელიამ ევრობასკეტზე ტრავმის გამო ვერ იასპარეზა.
2022 წელს ევრობასკეტის ერთ-ერთი მასპინძელი თბილისი იყო. მაშინ საქართველოს ნაკრებმა ჯგუფური ეტაპის დაძლევა ვერ მოახერხა.
ლიმასოლისკენ მიმავალი გზა საქართველოს ნაკრებმა ევრობასკეტამდე ერთი თვით ადრე იურმალაში დაიწყო. 4 ქვეყანა 6 სპარინგ მატჩი, შეკრების უმეტესი დრო კაპიტნის გარეშე, მცირე ტრავმები და ექვსიდან 6 წაგება. ჩვენმა გუნდმა ევრობასკეტისთვის მზადების ფარგლებში, ისრაელთან, ესტონეთთან, ლიეტუვასთან, პოლონეთთან თითო, ჩეხეთთან კი 2 ამხანაგური მატჩი გამართა. საქართველოს ნაკრებს სპარინგ მატჩებში შესაძლებლობა არ მიეცა ოპტიმალური შემადგენლობით ეთამაშა.
ჯიკიჩმა გაფართოებულ შემადგენლობაში 16 კალათბურთელი გამოიძახა, - რატი ანდრონიკაშვილი, კამარ ბოლდუინი, ლუკა მაზიაშვილი, გიორგი ოჩხიკიძე, დუდა სანაძე, სანდრო სანაძე, კახა ჯინჭარაძე, ალექსანდრე ფევაძე, გიორგი სულაბერიძე, ბექა ბურჯანაძე, თორნიკე შენგელია, გიორგი კორსანტია, გოგა ბითაძე, გიორგი შერმადინი და ილია ლონდარიძე.
საწვრთნელი შეკრების შემდეგ, 12-ის ნაცვლად ნაკრებში 13 მოთამაშე დატოვა, ევრობასკეტისთვის 12-კაციანი შემადგენლობის მიღმა კი ილია ლონდარიძე დარჩა.
საქართველოს ნაკრების ოფიციალური შემადგენლობა ევროპის ჩემპიონატზე:
რატი ანდრონიკაშვილი, კამარ ბოლდუინი, გიორგი ოჩხიკიძე, კახა ჯინჭარაძე, დუდა სანაძე, ალექსანდრე ფევაძე, თორნიკე შენგელია, სანდრო მამუკელაშვილი, ბექა ბურჯანაძე, გიორგი კორსანტია, გოგა ბითაძე, გიორგი შერმადინი.
ჯიკიჩმა პრესკონფერენციაზე გუნდის მზაობაზე ისუაბრა:
“ჩვენ მზად ვართ ბრძოლისთვის, ევრობასკეტი იწყება და წინ დიდი შეხვედრა გველოდება ესპანეთთან. შეკრების პერიოდშისირთულეები იყო მაგრამ ეს უკვე წარსულია, ამ დროისთვის მხოლოდ პირველ მატჩზე ვფიქრობთ. ესპანეთთან დაპირისპირება ჩემთვის განსაკუთრებულია, რადგან მოქმედი ჩემპიონი გუნდის ერთ-ერთი ყველაზე სახელოვანი მწვრთნელის წინააღმდეგ უნდა ვითამაშო. ლიმასოლში ბევრ ქართველ ქომაგს ველით.”
საქართველო VS ესპანეთი
2022 წლის, 4 ივლისი, პირველი მატჩი “თბილისი არენაზე,” იმ დღეს ევრობასკეტისთვის აშენებულმა დარბაზმა გამოცდა ჩააბარა, საქართველოს ნაკრებმა კი იზეიმა ისტორიული გამარჯვება, რაც ასე, სენსაციურად, იკითხება, - საქართველოს კალათბურთელთა ნაკრებმა მსოფლიოს მოქმედ ჩემპიონს მოუგო.
იმ თმაშში ყველაფერი ოვერტაიმში გადაწყდა, მთელმა გუნდმა იბრძოლა, მატჩის გმირი კი ოვერტაიმში ჩაგდებული 8 ქულით, რატი ანდრონიკაშვილი გახდა, რასაც მაკფადენის 3 ქულიანი დაემატა და ტაბლოზე 82:76 დაფიქსირდა.
ზუროსის გაწვრთნილმა საქართველოს ნაკრებმა 2023 წლის მსოფლიოს ჩემპიონატის პირველი შესარჩევი ეტაპის ბოლო ტურის მატჩში ესაპნეთთან მოგება დააფიქსირა, თუმცა მაშინ ესპანეთი თბილისში ლიდერების გარეშე ჩამოვიდა.
ჩვენი ქვეყნის დედაქალაქს ვარსკვლავური ესპანაეთი (მათ შორის , რუდი ფერნანდესი, ვილი ერნანგომესი, ხუანჩო ერნანგომესი) რამდენიმე კვირაში, ევრობასკეტის ჯგუფური ეტაპის მატჩების ჩასატარებლად ეწვია და ამჯერად, საქართველოს ნაკრებმა 64:90 წააგო, ესპანეთი კი რამდენიმე დღეში ევროპის ჩემპიონი გახდა.
პირველად ჩვენი გუნდი ესპანეთს ევრობასკეტი 2013-ზე შეხვდა, მეტოქის რიგებში მაშინაც ვარსკვლავები თამაშობდნენ, (რუდი ფერნანდესი, რიკი რუბიო, ხუან მანუელ კალდერონი, მარკ გასოლი, სერხიო ლული) მაშინ 59:83 წავაგეთ.
კიდევ ერთი მატჩი საქართველოსა და ესპანეთს შორის 2021 წელს, მსოფლიო ჩემპიონატის საკვალიფიკაციო ეტაპის ფარგლებში გაიმართა და ესპანეთმა 89:61 მოიგო.
4 მატჩი - 1 მოგება, 3 წაგება - ასეთია საქართველოს სტატისტიკა ძლიერ მეტოქესთან.
რაც შეეხება FIBA-ს მსოფლიო სატურნირო მდგომარეობას, ამ დროისთვის, ესპანეთი მე-5 ადგილზეა, საქართველო 24-ე პოზიციას იკავებს, ევროპაში კი ესპანეთი მეოთხეა საქართველო მე-14.
ესპანეთის ნაკრები
ევროპის მოქმედი ჩემპიონის, ესპანეთის ნაკრებში თაობათა ცვლაა, თუმცა ეს პროცესი აქტუალური იყო წინა ევრობასკეტზეც, 2022 წელს თბილიში ჩამოსულმა ესპანეთის ნაკრების მთავარმა მწვრთნელმა, სერჯო სკარიოლომ განაცხადა, “ ესპანეთის ნაკრებში თაობათა ცვლა მიმდინარეობს, 12-დან 8 მოთამაშეს არასდროს უთამაშია ასეთი დონის ტურნირზე, მაგრამ ჩვენ ამის შიში არ გვაქვს,” - ახალი ფორმაციის ეპსანეთმა კი ჩემპიონობა იზეიმა.
ისევე, როგოც მაშინ სკარიოლო საქართველოს ნაკრებს მარტივ მეტოქედ არ აღიქვამს, მატჩამდე პრესკონფერენციაზე განაცხდა: “არ უნდა დაგვავიწყდეს, რომ საქართველოს ნაკრებმა ერთხელ უკვე დაგვამარცხა. ამჯერადაც კარგი გუნდით არიან ჩამოსულები. განსაკუთრებული მობილიზება გვჭირდება, რათა ქართველები ფარქვეშ არ შევუშვათ”
ესპანეთი ნაკრები ტურნირის ძირითად ფავორიტად არ მიიჩნევა, ამჟამად ესპანეთისთვის დამახასიათებელი არც ვარსკვლავური შემადგენლობა ყავთ, თუმცა 2022 წელს რა მოხდა უკვე გავიხსენეთ.
ესპანელების შემადგენლობა ევრობასკეტ 2025-ზე:
მარიო სენ-სუპერი, სერხიო დე ლარეა, დარიო ბრიზუელა, სანტი იუსტა, ჟოელ პარა, ხაბი ლოპეს-აროსტეგი, ხოსეპ პუერტო,სანტი ალდამა, ხუანჩო ერნანგომესი, ვილი ერნანგომესი, ხაიმე პრადილია, იანკუბა სიმა.
ამ ნაკრებიდნად ექვსმა წინა ევრობასკეტზე ითამაშა, (ვილი ერნანგომესი, ხუანჩო ერნანგომესი, დარიო ბრიზუელა, ხოელ პარა, ხაიმე პრადილია, ხაბი ლოპეს-აროსტეგი), აღსანიშნავია, რომ ვილი ერნანგომესი 2022 წელს ევრობასკეტის MVP გახდა. ამჟამად ესპანელთა რიგებში NBA-ის ერთი მოთმაშეა, სანტი ალდამა (მემფისი), ალდამას ევრობასკეტზე გამგზავრება კითხვის ნიშნის ქვეშ იყო ტრავმის გამო, თუმცა რეაბილიტაციის გავლა შეძლო.
ესპანეთის ნაკრებმა ევრობასკეტამდე 6 ამხანაგური მატჩი ჩაატარა, საიდანაც მხოლოდ ჩეხეთს მოუგო, წააგო პორტუგალიასთანაც - 74:76, გერმანიასთან 2 მატჩი ჩაატარა ერთი განსაკუთრებით დაძაბული აღმოჩნდა, ოვერტაიმში წააგო 105:106, ასევე 2 სპარინგ მატჩი გამართეს საფრანგეთთთან.
ვის უნდა მივაქციოთ ყურადღება ევრობასკეტზე? რომელი ნაკრები შემოგვთავაზებს სიურპრიზს? - ამ კითხვების საპასუხოდ FIBA-მ 14 ნაკრები შეარჩია, რომელთა შორის საქართველოს ნაკრებიც მოხვდა.
შეძლებს თუ არა საქართველოს ნაკრები გულშემატკივრის გაოცებასა და ისტორიული შედეგის დაფიქსირებას? - ამას მომდევნო დღეებში შევიტყობთ, დღეს კი საქართველოს ნაკრებს ევრობასკეტზე მნიშვნელოვანი გამოცდა ელის, შენგელიას თამაშის საკითხი გაურკვეველია, თუმცა იმედია ჩვენი გუნდი ოპტიმალური შემადგენლობით თამაშებს და სასურველი შედეგისკენ სვლას დაიწყებს.
საქართველოს ნაკრების მატჩების განრიგი, თბილისის დროით:
საქართველო – ესპანეთი - 28 აგვისტო, 16:00 საათი
საქართველო – იტალია - 30 აგვისტო, 16:00 საათი
საქართველო – საბერძნეთი - 31 აგვისტო, 16:00 საათი
საქართველო – კვიპროსი - 2 სექტემბერი, 19:15 საათი
საქართველო – ბოსნია-ჰერცეგოვინა - 4 სექტემბერი, 16:00 საათი
