საქართველოს კალათბურთელთა ნაკრებმა, მორიგი სენსაციური გამარჯვება მოიპოვა. ჩვენმა გუნდმა ევრობასკეტის პლეიოფში საფრანგეთის უძლიერესი ნაკრები დაამარცხა და პირველად საქართველოს ისტორიაში ევრობასკეტის მეოთხედფინალში ითამაშებს. შეგახსენებთ, საფრანგეთი ევრობასკეტის მოქმედი ვიცე-ჩემპიონია.
დღესვე საქართველოს ეროვნულმა საფეხბურთო ნაკრებმა 2026 წლის მსოფლიოს ჩემპიონატის საკვალიფიკაციო ეტაპია მეორე მატჩი გამართა. ჩვენმა გუნდმა “დინამო არენაზე” ბულგარეთს უმასპინძლა და 3-0 დაამარცხა.
ქართველმა ფეხბურთლებმა მოგებული მატჩის შემდეგ კალათბურთელებს გამარჯვება მიულოცეს:
ხვიჩა კვარაცხელია: ძალიან გაგვახარეს, უდიდესი ბედნიერება გვაჩუქეს, ჩემი აზრით, დღეს საქართველოს დღეა, რადგან ასეთი წარმატება იშვიათია. ვულოცავ საქართველოს კალათბურთელთა ნაკრებს ევრობასკეტზე მეოთხედფინალში გასვლას, ძალიან გაგვიხარდა, უდიდესი ისტორია დაწერეს და კიდევ შეუძლიათ წინ წასვლა. თითოეული ფეხბურთელი ვულოცავთ, ბედნიერები ვართ მათი ამ საოცარი გამარჯვებით.
ზურიკო დავითაშვილი: მინდა კალათბურთის ნაკრებს მივულოცო ევრობასკეტზე წარმატება. აქედან ვქომაგობთ და ყველა თამაშს ვუყურებთ, დღეს ვერ შევძელით მატჩის ყურება, თუმცა მთავარია გავიმარჯვეთ.
გიორგი ქოჩორაშვილი: ვულოცავ საქართველოს კალათბურთელთა ნაკრებს ევრობასკეტზე ისტორიული შედეგის დაფიქსირებას. მეოთხედფინალში ფინეთთანაც იმედია, გავიმარჯვებთ.
ნიკა გაგნიძე: სასწაული გააკეთეს ჩვენმა კალათბურთელებმა და მთელ საქართველოს ვულოცავ ამ დიდ გამარჯვებას.
საბა გოგლიჩიძე: ვულოცავ საქართველოს კალათბურთელთა ნაკრებს გამარჯვებას, დღეს ჩვენი დღე იყო და გავიმარჯვეთ.
