სეზონის სტარტზე, პსჟ-ში ტრავმიანობამ იმატა. ამ ეტაპზე, პარიზელთა 5 ფეხბურთელია ტრავმირებული, მათ შორის ხვიჩა კვარაცხელიაც.
საბედნიეროდ, კვარას ტრავმა სერიოზული არ არის და მომდევნო მატჩში ის სათამაშოდ მზად იქნება. თუმცა ჩნდება კითხვა - რატომ იღებენ პსჟ-ს ფეხბურთელები ტრავმებს ასეთი სიხშირით?
საქმე იმაშია, რომ მსოფლიოს საკლუბო ჩემპიონატის დასრულების შემდეგ, პსჟ-ს მთავარი მწვრთნელი ლუის ენრიკე უცნაური ინიციატივით გამოვიდა და ფეხბურთელებს 3-კვირიანი დასვენების საშუალება მისცა.
მსოფლიო ფეხბურთში, მათ შორის საქართველოშიც, კლუბები წინა სასეზონო შეკრებას გადიან და ჯერ იმისთვის ემზადებიან, რომ კარგ ფიზიკურ კონდიციებში იყვნენ, შემდეგ კი ბურთთან ერთად ვარჯიშობენ და ორჯერადი ვარჯიშები აქვთ, რაც აუცილებელია. პსჟ კი ამ 3-კვირიანი დასვენების შემდეგ, პირდაპირ სათამაშოდ გავიდა, არც შეკრება გაუვლიათ, არც ამხანაგურები უთამაშიათ და სუპერთასის მატჩამდე მხოლოდ 3 არასრულფასოვანი ვარჯიში მოასწრეს.
სუპერთასზე ტოტენჰემთან მატჩშიც ვნახეთ, რომ პსჟ-ს ფეხბურთელები არც ტაქტიკურად და არც ფიზიკურად არ იყვნენ მომზადებულები და ლონდონელებმა აჯობეს, თუმცა ბოლოს თავი კლასმა და გამოცდილებამ იჩინა და ტიტული მაინც მოიგეს.
როცა გუნდი წინასასეზონო მზადებას არ გადის და პირდაპირ გრძელვადიან სეზონს იწყებს, ტრავმის მიღების ალბათობა დიდია, რაც ახლა პსჟ-ს შემთხვევაში გამოჩნდა.
გასული სეზონი პსჟ-სთვის ყველაზე გრძელვადიანი გამოდგა და ფეხბურთელებს დასვენება სჭირდებოდათ, თუმცა თავის მხრივ, მსოფლიო საკლუბო ჩემპიონატის გამარჯვებული ჩელსი ვადაზე ადრე შეიკრიბა და 2 ამხანაგური მატჩის ჩატარებაც მოასწრო, რათა სეზონს მზად შეხვედროდა.
ამ ყველაფერს ისიც ემატება, რომ სექტემბრის თვეში ყველაზე გადატვირთული და მძიმე კალენდარია, საკლუბო სეზონი ახალი დაწყებულია და ეგრევე სანაკრებო პაუზა იწყება, რაც ფეხბურთელებისთვის ორმაგი დატვირთვაა.
სწორედ სანაკრებო შეკრებაზე მიიღეს ტრავმები დეზირე დუემ და უსმან დემბელემ, რაც არა ნაკრების, არამედ იმ კლუბის შედეგად მოვიდა, რომელმაც სეზონის წინ ფეხბურთელები სათანადოდ არ მოამზადა.
გუშინდელ მატჩში ტრავმა ლიმ და ბერალდომ მიიღეს, რომელთა მდგომარეობა ამ დრომდე უცნობია. დემბელე და დუე მინიმუმ 4 კვირას გამოტოვებენ.
ფაქტი ისაა, რომ პსჟ-მ დიდი შეცდომა დაუშვა, როცა სეზონის წინ შეკრება საერთოდ არ გაუვლია, არცერთი სპარინგ მატჩი არ ჩაუტარებია და თავიანთი ფეხბურთელები კარგი ფიზიკური მომზადების გარეშე დატვირთა.
