გუნდური მსოფლიოს ჩემპიონობა და 4 მედალი ინდივიდუალურ ასპარეზობაში, - რამდენიმე წუთის წინ, უნგრეთში გამართული ძიუდოს მსოფლიოს ჩემპიონატიდან ქართველი ძიუდოისტები სამშობლოში ისტორიული შედეგით დაბრუნდნენ. ჩემპიონებს თბილისის საერთაშორისო აეროპორტში გულშემატკივრებმა დახვედრის საზეიმო ცერემონია მოუწყვეს.
პირველად ისტორიაში საქართველოს ძიუდოს ნაკრები შერეულ გუნდურ ასპარეზობაში მსოფლიოს ჩემპიონი გახდა. გუნდურ შეჯიბრებაში, ეთერ ლიპარტელიანმა, მარიამ ჭანტურიამ, სოფიო სომხიშვილმა, ლაშა ბექაურმა, გურამ თუშიშვილმა და მიხეილ ბახბახაშვილმა იასპარეზეს.
ჩვენმა გუნდმა, ჩინეთის, იტალიის, იაპონიისა და სამხრეთ კორეის ნაკრებები დაამარცხა. ქართველმა ძიუდოისტებმა მთავარი სენსაცია იაპონიასთან მოგებით ნახევარფინალში დააფიქსირეს, რადგან 2018 წლიდან იაპონია ერთპიროვნული ჩემპიონი იყო.
ფინალში საქართველოს ძიუდოს ნაკრებმა სამხრეთ კორეას სძლია, ეთერ ლიპარტელიანმა მიმი ჰუჰს, მიხეილ ბახბახაშვილმა დონგჰიუნ ბაეს, მარიამ ჭანტურიამ იერანგ ლის, ლაშა ბექაურმა კი იონგჰომ კიმს მოუგო დაქართველებმა 4-1 გაიმარჯვეს.
საქართველოსთვის 2025 წლის მსოფლიოს ჩემპიონატი ისტორიული აღმოჩნდა ინდივიდუალურ ასპარეზობაშიც. ეთერ ლიპარტელიანი (57 კგ) გახდა პირველი ქართველი ქალი მსოფლიოს ჩემპიონი ძიუდოისტი, აღსანიშნავია, რომ ეთომ ჯამურად 9 შეხვედრა ჩაატარა, ყველა მოიგო, 8 დაპირისპირებაში კი იპონით გაიმარჯვა. ვერცხლის მედლები საქართველოს ნაკრებს ტატო გრიგალაშვილმა (-73 კგ.) და გურამ თუშიშვილმა (+100 კგ.) მოუტანეს, ბრინჯაოს მედალი კი ლუკა მაისურაძის (-90 კგ.) ანგარიშზეა.
