EA Sports-ის პოპულარულმა სიმულატორმა ორიოდე წლის წინ დაკარგა FIFA-ს სახელი, მაგრამ მისმა პოპულარობამ ოდნავადაც არ იკლო. EA FC 25-ში საქართველოს ნაკრები სამწუხაროდ ისევ არაა, მაგრამ ჩვენი ქვეყანა რამდენიმე ძალიან ძლიერი ფეხბურთელით მაინცაა წარმოდგენილი.
თამაშის ყველაზე პოპულარული რეჟიმი Ultimate Team-ია, და ჩვენს ფეხბურთელებს განსაკუთრებული ქარდებიც აქვთ მიღებული. მოდი ვიხილოთ ხუთი ქართველი ფეხბურთელის საუკეთესო ქარდები.
1. ხვიჩა კვარაცხელია – 95, Fantasy FC ქარდი
არავისთვის იქნება გასაკვირი, რომ EA FC 25-ში ქართველთა შორის საუკეთესო ქარდი ხვიჩას აქვს. ეს ქარდი Fantasy FC სერიიდანაა, რომელშიც სეზონის განმავლობაში 15 გამორჩეული ფეხბურთელი მოხვდა. ხვიჩა მათ შორისაც საუკეთესოა: 95 სტატი მხოლოდ ომარ მარმუშს აქვს, თავდამსხმელად განწესებულ სონს კი 94 რეიტინგი მიანიჭეს.
ამ ქარდში ხვიჩას ყველა დრიბლინგის სტატში 99 აქვს, რაც მას ფაქტიურად შეუჩერებელს ხდის. 91 დარტყმის ძალა და შესრულება, ასევე 92 შორეულ დარტყმებში ნიშნავს რომ მისგან ხიფათი ყველა პოზიციიდანაა მოსალოდნელი.
ხვიჩას ამ ქარდს კიბერ ლიგის პრო მოთამაშეებიც კი იყენებენ. რა თქმა უნდა, ხვიჩასნაირ გამორჩეულ ფეხბურთელს სხვა ქარდებიც აქვს, მაგრამ სწორედ Fantasy FC-ა გამორჩეული.
2. გიორგი მიქაუტაძე – 90, TOTY Honourable Mentions ქარდი
ჩვენს საყვარელ ფრანგ ქართველს შესანიშნავი ქარდი აქვს სეზონის გუნდში ვერ მოხვედრილთა სერიიდან. ჩვენ ძალიან კარგად ვიცით თუ რა შეუძლია კარის წინ ჟორჟს, და სწორედ ეს დაუფასეს EA FC 25-შიც: 92 შესრულება, 90 დარტყმის ძალა, ფეთქებადი აჩქარება და ერთი შეხებით თამაშის ოქროს ფლეისთაილი.
მიქაუტაძე ტოპ თავდამსხმელების დონეს ოდნავ ვერ აღწევს, და ვერც ისეთი მრავალმხრივია, როგორც მბაპე, ჰოლანდი, კეინი, ლევანდოვსკი ან რონალდუ, მაგრამ თავის საქმეს კარის წინ ის ზედმიწევნით კარგად ასრულებს. გიორგის ასევე 85 რეიტინგიანი Team of the Week ქარდიც აქვს.
3. გიორგი მამარდაშვილი – 89, Team of the Week ქარდი
ჩვენი ნაკრების პირველი ნომერი აგვირგვინებს ტოპ სამეულს. ეს ქარდი Team of the Week სერიიდანაა, მას სეზონის განმავლობაში კვირის საუკეთესო ფეხბურთელებს ანიჭებენ. ამიტომ არაა გასაკვირი, რომ მამარდაშვილს ეს ქარდი აქვს. ამ ქარდში გამორჩეულია ოთხი ვარსკვლავი სუსტი ფეხით თამაშში, ასევე ჩაწოდებებზე გამოსვლის და ხელით ბურთის შორს სროლის ოქროს ფლეისთაილები. სამწუხაროდ, მას ერთი უდიდესი პრობლემაც აქვს: მხოლოდ 74 რეაქციაში. ამის გამო, მამარდაშვილის ამ ქარდის გამოყენება შეუძლებელია ტოპ დონეზე. ვიმედოვნოთ, რომ ჩვენი კარის დარაჯი სულ მალე ახალ ქარდს მიიღებს.
4. ზურიკო დავითაშვილი – 86, Winter Wildcards ქარდი
მეოთხე ადგილზე ჩვენი სენტ-ეტიენის შემტევი ზურიკო დავითაშვილია. მისი ეს ქარდი Winter Wildcards-ის სერიიდანაა, რომელშიც თვალსაჩინო მოთამაშეები მოხვდნენ წინასაახალწლოდ. ამ ქარდის პარადოქსი იმაშია, რომ მასში ზურიკოს პოზიცია მარცხენა მცველია. ჩვენ კარგად ვიცით, რა უნივერსალიცაა დავითაშვილი, მაგრამ მცველი როგორც მთავარი პოზიცია? არ ვიცით, არ ვიცით… ამისდა მიუხედავად, ეს არაა ცუდი ქარდი. ძალიან კარგი დრიბლინგი, მაღალი სისწრაფე, პასებსაც არა უშავს, დაცვის სტატებიც მაღალია. მისი წინ გაწევაც შეიძლება, მაგრამ მისი ფლეისტაილები და სტატები მაინც ზედმეტად დაცვითია ვინგერისთვის.
მამარდაშვილის მსგავსად, ვიმედოვნებთ, რომ ზურიკოც მიიღებს კარგ ქარდს.
5. ვაკო ყაზაიშვილი – 75, Common ქარდი
დიახ, სამწუხაროდ, მხოლოდ ოთხ ქართველ ფეხბურთელს აქვს სპეციალური ქარდი. ვაკო ნაკრებში აღარ თამაშობს, მაგრამ მას მაინც აქვს შედარებით მაღალი სტატები. როგორც ყოველთვის, ვაკო სისწრაფითა და დრიბლინგით გამოირჩევა. სამწუხაროდ, დარტყმის სტატები იმაზე დაბალია, ვიდრე მას ეკუთვნის: 69 შესრულება და 73 დარტყმის ძალა.
ვაკოს თანაგუნდელ კრიზანს Team of the Week ქარდი აქვს, ასე რომ გამორიცხული არაა, რომ ყაზაიშვილმაც მიიღოს სპეციალური ქარდი.
ეს იყო ჩვენი ტოპ 5 ფეხბურთელის საუკეთესო ქარდები EA FC 25-ში. ვიმედოვნოთ, რომ შემდეგ თამაშში ჩაკვეტაძე, კიტეიშვილი, ქოჩორაშვილი, წიტაიშვილი და სხვები ბევრად უფრო მაღალ შეფასებას მიიღებენ და სპეციალურ ქარდებზეც მოხვდებიან!
