2025 წლის ივლისის ტესტები ქართული რაგბისთვის გამორჩეული იქნება — ბორჯღალოსნების ისტორიაში პირველად ირლანდიას თბილისში უმასპინძლებენ, ხოლო შემდეგ ჩიტასს და სამხრეთ აფრიკის ნაკრებს ესტუმრებიან.
საქართველოს ნაკრები სრული შემადგენლობით შეიკრიბა და ზაფხულის ტესტებისთვის აქტიურად ემზადება. ბორჯღალსონების უცვლელ წევრს, ვასილ ლობჟანიძეს შევხვდით, რომელმაც ეროვნულ ნაკრებზე და ივლისის ტესტების მნიშვნელობაზე და ისაუბრა.
- 2015 წლიდან ეროვნული წევრი ხარ. რას ნიშნავს შენთვის ბორჯღალოსნებში თამაში?
"არ აქვს მნიშვნელობა რაგბი იქნება, ფეხბურთი თუ კალათბურთი — ეროვნულ ნაკრებში თამაში ყველა სპორტსმენის ოცნებაა. 18 წლის ასაკში მოვხვდი ბორჯღალოსნებში და ძალიან გახარებული ვიყავი. ეს ემოციები და მოედანზე სულისკვეთება 10 წელია მომყვება და იმედი მაქვს, რომ კარიერის ბოლომდე ასე გაგრძელდება."
*ვასილ ლობჟანიძე ფიჯის წინააღმდეგ, 2023
- 2015 წლის მსოფლიო თასის შემდეგ, სადაც ყველაზე ახალგაზრდა მონაწილე იყავი ბრივთან გააფორმე კონტრაქტი. რა იყო პირველი შთაბეჭდილება ტოპ 14-ში გადასვლის შემდეგ?
"ჩემი მთავარი მიზანი ევროპაში თამაში იყო და 19 წლის ასაკში მოვაწერე კონტრაქტს ხელი ბრივთან, სადაც დაახლოებით 8 წელი ვითამაშე. რა თქმა უნდა საოცარი ემოციები მივიღე როდესაც ტოპ 14-ში მოვხვდი და იქ ბევრი რამე ვისწავლე."
- 5 ივლისს თბილისში პირველად ჩამოდის ირლანდიის ეროვნული ნაკრები. როგორ ემზადებით აღნიშნული მატჩისთვის და როგორი განწყობაა გუნდში?
"ირლანდიას საქართველოში ისტორიაში პირველად ვუმასპინძლებთ და ეს ჩვენთვის უმნიშვნელოვანესი მატჩი იქნება. ბიჭებმა 11 ივნისიდან დაიწყეს ვარჯიშები და ვფიქრობ, რომ ყველაფერი კარგად მიდის. დარწმუნებული ვარ, რომ ივლისის ტესტებს როგორც ფიზიკურად, ასევე ტაქტიკურად კარგად მომზადებულები შევხვდებით."
ირლანდიის შემდეგ იქნება ტურნე სამხრეთ აფრიკაში, მათ შორის მსოფლიო ჩემპიონებთან მატჩი. რას ნიშნავს მსგავსი ტესტები ქართული რაგბის განვითარებისთვის?
"მსგავსი დონის მატჩები ჩვენთვის იშვიათია და სულ ვითხოვთ, რომ პირველი დონის გუნდებთან რაც შეიძლება ხშირად მოგვეცეს თამაშის საშუალება. ივლისში კი 3-დან ორი მატჩი რეიტინგის პირველ და მესამე ნომრებთან გვექნება, რაც ჩვენი განვითარებისთვის რა თქმა უნდა უმნიშვნელოვანესი ნაბიჯი იქნება."
ხშირად ისმის საუბრები საქართველოს 6 ერში მიღებაზე. არის მზად ეროვნული ნაკრები მსგავსი გამოწვევისთვის?
"ვფიქრობ ამ დონეზე თამაშში ჩვენთვის მთავარი პრობლემა გუნდის სიღრმე იქნება, რადგან ფიზიკურად ურთულესი ტურნირია. საჭიროა, რომ რაც შეიძლება მეტი მორაგბე ირიცხებოდეს ეროვნულ ნაკრებში და დონეები მეტ-ნაკლებად დაბალანსებული იყოს. უნდა გავაგრძელოთ განვითარება, ბევრი ვისწავლოთ და რაც მთავარია, ნაკრების სიღრმე კიდევ უფრო მეტად შეივსოს."
უკვე წელიწად ნახევარია ბორჯღალოსნების მთავარ მწვრთნელად რიჩარდ ქოქრილი მუშაობს. რა შეცვალა ბრიტანელმა სპეციალისტმა გუნდში?
"კარგად შეისწავლა ქართული გუნება და ჟინი, რასაც კარგად იყენებს — ზუსტად იცის როგორ მოგვიდგეს და რა მოგვთხოვოს. სტილისტურად და ტაქტიკურად ბევრი არაფერი შეცვლილა და გუნდი აგრძელებს იმ განვითარებას, რაც წლების წინ დაიწყო. ვფიქრობ, რომ რიჩარდი ძალიან კარგად მუშაობს და რაც მთავარია გუნდი აგრძელებს განვითარებას."
2027 წლის მსოფლიო თასი განსხვავებული ფორმატით ჩატარდება და დიდი შანსია, საქართველო პირველად გავიდეს პლეი-ოფში. რა არის პროგრამა მინიმუმი რისთვისაც იბრძოლებთ მსოფლიო თასზე?
"ახალი ფორმატი საინტერესო იქნება და რა თქმა უნდა პროგრამა მინიმუმი ჯგუფიდან გასვლა იქნება. პლეი-ოფში კი ყველაფერი ხდება და ნებისმიერ მეტოქესთან ბოლომდე ვიბრძოლებთ. მსოფლიო თასამდე 2 წელია დარჩენილი და ყველაფერს გავაკეთებთ იმისთვის, რომ ტურნირს კარგად მომზადებულები შევხვდეთ."
რომელია შენთვის ყველა დიდი და დასამახსოვრებელი გამარჯვებები ბორჯღალოსნებთან ერთად?
"რთულია ასე ერთის გამოყოფა, თუმცა, ჩემთვის კარგად დასამახსოვრებელი იყო 2015 წლის მსოფლიო თასზე ტონგასთან მოპოვებული გამარჯვება. რა თქმა უნდა იტალიასთან, უელსთან და იაპონიასთან მოგებებიც დაუვიწყარი იყო ჩვენთვის."
*ვასილ ლობჟანიძე ტონგას წინააღმდეგ, 2015
რას ურჩევთ ახალგაზრდა მორაგბეებს, რომლებიც ახლა იწყებენ პროფესიონალურ კარიერას?
"კარიერა ძალიან სწრაფად გადის და მაქსიმალური უნდა გააკეთონ განვითარებისთვის. აუცილებლად ბევრი ივარჯიშონ და ტყუილად არ დაკარგონ დრო. რაც მთავარია საქმეს პროფესიონალურად უნდა მიუდგნენ და მიზნის მისაღწევად ყველაფერი გააკეთონ. თავდაუზოგავი შრომა ყოველთვის გამოიღებს შედეგს."
და ბოლოს, რას ეტყვით ქართველ გულშემატკივრებს ირლანდიასთან მატჩის წინ?
"პირველ რიგში ქართველ გულშემატკივრებს დიდი მადლობა მინდა გადავუხადო, რადგან ყოველთვის მოდიან სტადიონზე და გვერდში გვიდგანან. ირლანდიასთან მათი მხარდაჭერა რა თქმა უნდა ჩვენთვის უმნიშვნელოვანესი იქნება, რადგან ძალიან რთული მეტოქეა და დარწმუნებული ვარ, რომ გულშემატკივრების დახმარებით გავიმარჯვებთ."
ბორჯღალოსნების განრიგი 2025 წლის ზაფხულის ტესტებზე
საქართველო V ირლანდია (5 ივლისი, 21:00, თბილისი)
ჩიტასი V საქართველო (11 ივლისი, 21:00, ბლუმფონტეინი)
სამხრეთ აფრიკა V საქართველო (19 ივლისი, 19:10, მბომბელა)
