ჩემპიონთა ლიგის 1/8 ფინალის განმეორებით მატჩში ლივერპულმა ენფილდზე გალათასარაის 4-0 მოუგო და შემდეგ ეტაპზე გავიდა.
მატჩის დასრულების შემდეგ, ინგლისური კლუბის თავკაცმა, არნე სლოტმა კომენტარი გააკეთა და აღნიშნა, რომ მისი გუნდის თამაშით კმაყოფილია.
"დასაწყისიდან დასასრულამდე ზუსტად ისეთი თამაში ვაჩვენეთ, როგორსაც მე, ფეხბურთელები და გულშემატკივრები ველოდებოდით. ჩვენი მხრიდან ეს თითქმის სრულყოფილი მატჩი იყო, გულშემატკივრები კი უბრალოდ შეუდარებლები იყვნენ."
"სალაჰმა პირველ ტაიმში პენალტი ვერ გამოიყენა, თუმცა, შესვენების შემდეგ ჯერ ასისტი მიითვალა და შემდეგ საფირმო გოლი გაიტანა. ეს ყველაფერი მის მენტალურ სიმტკიცეზე მეტყველებს. მან მატჩის ბოლოს დისკომფორტი იგრძნო და დამატებითი გამოკველვებია საჭირო დაზიანების დასადგენად."
"ჩვენი შემდეგი მეტოქე, პსჟ საოცარი გუნდია და ამ სეზონშიც გამოჩნდა, რომ უმაღლესი დონე არ დაუწევიათ. მათ გასული სეზონის 1/8 ფინალში შევხვდით და ერთადერთი გუნდი ვიყავით, რომელმაც მატჩი ჯერ დამატებით დრომდე, შემდეგ კი თერთმეტმეტრიანების სერიამდე მიიყვანა. პსჟ-ს წინააღმდეგ ენფილდზე ჩატარებული მატჩი ჩემს სამწვრთნელო კარიერაში საუკეთესო იყო" — არნე სლოტი.
უეფას ჩემპიონთა ლიგის 1/4 ფინალში ლივერპულის და პსჟ-ს პირველი შეხვედრა 7 აპრილს გაიმართება, ხოლო განმეორებით დაპირისპირება 14 აპრილს შედგება.
