შეხვედრა საკმაოდ საინტერესოდ დაიწყო. მე-16 წუთზე, ადამ ბუქსამ პოლონეთის წინ გაყვანა მოახერხა, თუმცა პრობიერჟის გუნდის ზეიმი მალე დასრულდა — მატჩის 29-ე წუთზე კოდი გაკპომ ანგარიშის გათანაბრება მოახერხა. პირველ ტაიმში კუმანის გუნდი ძალიან დიდ უპირატესობას ფლობდა.
მეორე ნახევარიც ნიდერლანდელთა შეტევებით დაიწყო, თუმცა პოლონეთი კარს საკმაოდ კარგად იცავდა. მატჩის 81-ე წუთზე, კუმანმა მოედანზე ვუტ ვეგჰორსტი შეუშვა, ამ უკანასკნელმა კი ზუსტად ორ წუთში, საკუთარი გუნდის წინ გაყვანა მოახერხა. მატჩი საბოლოოდ 1:2 დასრულდა, კუმანის გუნდი კი ამ გამარჯვებით D ჯგუფს სათავეში ჩაუდგა.
