დღეს თბილისის დროით, 16:00 საათზე ლიმასოლში, საქართველოს საკალათბურთო ნაკრები ევრობასკეტის C ჯგუფში მესამე შეხვედრას გამართავს. ჩვენი გუნდი საბერძნეთის ნაკრებს დაუპირისპირდება.
შეგახსენებთ, საქართველოს ნაკრები ჩვენი ქვეყნის ისტორიაში ზედიზედ, მეექვსე ევრობასკეტზე ასპარეზობს.
კარგი ამბავი საქართველოს ნაკრებში
საქართველოს ნაკრებმა ევროპის ჩემპიონატი სენსაციური გამარჯვებით დაიწყო, ესპანეთს 83:69 მოუგო. ხმაურიანი სტარტის შემდეგ, ჩვენი გუნდი იტალიას დაუპირისპირდა და 3 მეოთხედი მოგებაზე ფიქრიც შეიძლებოდა, მომენტებში იგებდა კიდეც, პირველი ტაიმი ფრედ, 32:32 დასრულდა, თუმცა დასკვნით მეოთხედში იტალიელები გაიქცნენ და საბოლოოდ, 78:62 გაიმარჯვეს.
თამაშის დასრულებამდე საქართველოს ნაკრების კაპიტანს მოედანი დაატოვებინეს, მსაჯების სიტყვიერი შეურაცხყოფის გამო.რამდენიმე ეპიზოდში შენგელიაზე ფოლი არ დააფიქსირეს, რაც გააპროტესტა.
იტალიასთან ქართველთაგან ყველაზე შედეგიანი 22 ქულით გოგა ბითაძე იყო, რომელმაც გამორჩეული მატჩი ჩაატარა.
საქართველოს ნაკრები ევრობასკეტზე ურთულეს ჯგუფში რომ თამაშობს ამის შესახებ ხშირად საუბრობენ, თუმცა ზედიზედ უძლიერეს ნაკრებთან თამაშს კიდევ ერთი სირთულე ემატება, - მატჩები მიყოლებით, იტალიასთან თამაშის დასრულებიდან დაახლოებით, 22 საათში ჩვენ გუნდს საბერძნეთთან მატჩი ელის, რაზეც გუშინ ბექა ბურჯანაძემ ისაუბრა:
“ჩემთვის, როგორც კალათბურთელისთვის ეს მიუღებელია, ზედიზედ 2 თამაში, ძლიერ გუნდებთან. გულშემატკივარმა იცის საბერძნეთის ძლიერი კალათბურთელების შესახებ, არაამქვეყნიური დატვირთვაა მოთმაშეებისთვის, არამარტო ფიზიკური, გონებრივიც.
ჩვენ ვიცით რატომ ვართ აქ და ჩვენი მიზანი უცვლელია, სისხლის ბოლო წვეთამდე ვიბრძოლებთ.”
იტალიასთან წაგების მიუხედავად, ნაკრებში შემართება და გამარჯვების ჟინი უცვლელია, რაზეც საქართველოს ნაკრების მთავარმა მწვრთნელმა, ალექსანდრ ჯიკიჩმა ისაუბრა:
“ჩვენ ვიცით, რატომ ვართ აქ და რა არის ჩვენი მიზანი. ამიტომ, პირველი ორი თამაშის შემდეგ, ერთიანი ვართ, ბოლომდე მივიყვანთ ყველაფერს. შესაძლოა საბერძნეთთან მატჩში როტაცია ვიხილოთ.”
საქართველოს ნაკრების მთავარმა მწვრთნელმა, შესაძლოა ცვლილებებს მიმართოს, საბერძნეთთან თამაში დიდი თავსატეხი რომ არის მათი მხოლოდ ერთი კალათბურთელის სახელიც ადასტურებს - იანის ანტეტოკუნმპო -მილუოკი ბაქსის ლიდერი, რომელიც სანდრო მამუკელაშვილის გუნდელი იყო.
სირთულეების მიუხედავად, საქართველოს ნაკრებში კარგი ამბავია, როგორც გუშინ ჯიკიჩმა განაცხადა, გუნდში ტრავმირებული არავინაა, ეს კი მთავარ მწვრთნელს ბევრ შესაძლებლობას აძლევს.
საბერძნეთის ნაკრები
გამარჯვების განსაკუთრებული წყურვილი, - შეგვიძლია ასე დავახასიათოთ საბერძნეთის ნაკრები, თუმცა გამარჯვებაში საქართველოსთან მატჩის ან ჯგუფური ეტაპის დაძლევა არ იგულისხმება, ბერძნების მთავარი მიზანი ევრობასკეტის მოგებაა. საბერძნეთის ნაკრებს ევროპის ჩემპიონატი 2005 წლის შემდეგ არ მოუგია. 2022 წელს მეთხედფინალში გერმანიასთან წააგეს და შეჯიბრება მე-5 ადგილზე დაასრულეს.
დიდ ტურნირზე ვასილის სპანულისი საბერძნეთის ნაკრებს პირველად უხელმძღვანელებს და ბერძენ გულშემატკივრებს იმედი აქვთ, მისი გაწვრთლინი ნაკრები ჩემპიონობას იზეიმებს.
საბერძნეთი ევრობასკეტზე ამ დროდე სასურველი შედეგით ასპარეზობს, პირველ მატჩში იტალიას 75:66 სძლია, C ჯგუფში აუტსაიდერად მიჩნეული კვიპროსი კი 69:96 დაამარცხა.
რაც შეეხება საბერძნეთის ნაკრების შემადგენლობას, როგორც ავღნიშნეთ გუნდის მთავარი ვარსკვლავი იანის ანტეტოკუნმპოა, რომელმაც იტალიასთან 31 ქულა დააგროვა, კვიპროსთან კი ყველაზე მეტი, 18 ქულა დორსიმ ჩააგდო.
ევრობასკეტისთვის მზადების ფარგლებში ბერძნებმა 7 მატჩი ჩაატარეს, 4 გამარჯვება მოიპოვეს, (იტალიასთან, ლატვიასთან, მონტენეგროსთან და ბელგიასთან), 3 შეხვედრა წააგეს - საფრანგეთთან, ისრაელთან და სერბეთთან.
საბერძნეთის ნაკრების შმადგენლობა ევრობასკეტზე:
იანის ანტეტოკუნმპო („მილუოკი ბაქსი“), კოსტას სლუკასი („პანათინაიკოსი“), ტაილერ დორსი („ოლიმპიაკოსი“), ვასილის ტოლიოპულოსი („პანათინაიკოსი“), დიმიტრის კაციეველისი („აეკი“), პანაგიოტის კალაიძაკისი („პანათინაიკოსი“), იანულის ლარენძაკისი („ოლიმპიაკოსი“), კოსტას პაპანიკოლაუ („ოლიმპიაკოსი“), კოსტას ანტეტოკუნმპო („ოლიმპიაკოსი“), თანასის ანტეტოკუნმპო (თავისუფალი აგენტი), კონსტანტინოს მიტოღლუ („პანათინაიკოსი“), ალექსანდროს სამოდუროვი („პანათინაიკოსი“).
რაც შეეხება FIBA-ს მსოფლიო რეიტინგს, ამ დროისთვის, საბერძნეთი მე-13 ადგილზეა, საქართველო 24-ე პოზიციას იკავებს, ევროპაში კი საბერძნეთი მერვეა, საქართველო მე-14.
საბეძნეთთან საქართველოს ნაკრებს ამ დრომდე 9 მატჩი აქვს ჩატარებული და ერთი გამარჯვება, - 2017 წელს ათენში,აკროპოლისისთასზე.
რაც შეხება C ჯგუფის სატურნირო მდგომარებას, პირველ ადგილზე 2 მოგებით სბაერძნეთია, მეორე საქართველოა ერთი მოგებით, ასევე თითო მოგება აქვთ იტალაის, ესპანეთსა და ბოსნია და ჰერცეგოვინას, მესამე ესპანეთია, მეოთზე იტალია, მეხუთე ბოსნია და ჰერცეგოვინა, ბოლო ადგილზე კი კვიპროსია. ჯგუფიდან 4 საუკეთესო გადის.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში ტარდება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით ასპარეზობს და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველოს ნაკრების მატჩების განრიგი, თბილისის დროით:
საქართველო – საბერძნეთი - 31 აგვისტო, 16:00 საათი
საქართველო – კვიპროსი - 2 სექტემბერი, 19:15 საათი
საქართველო – ბოსნია-ჰერცეგოვინა - 4 სექტემბერი, 16:00 საათი
