ფაბრიციო რომანო მიიჩნევს, რომ ბრაიტონის მთავარი მწვრთნელი, რობერტო დე ძერბი, ჩავი ერნანდესის იდეალური შემცვლელი იქნება ბარსელონაში. პრობლემური საკითხია ფინანსური მხარე, უფრო კონკრეტულად კი სპეციალისტის ხელშეკრულებაში გაწერილი კლაუსულა, რომელიც მას ალბიონთან აკავშირებს.
"ბარსელონას სახელს უკავშირებენ არაერთ მწვრთნელს, თუმცა გადაწყვეტილი ჯერჯერობით არაფერია. ყოველდღიურად ვგებულობთ უამრავ ინფორმაციას, თუნდაც კლოპის კატალონიაში წასვლაზე, მაგრამ ეს ყველაფერი სიმართლეს არ შეესაბამება. კლუბის უფროსობას სჭირდება დრო გადაწყვეტილების მისაღებად.
ჩემი აზრით, "ბლაუგრანასთვის" იდეალური კანდიდატი დე ძერბი იქნებოდა. მან ძალიან კარგად იცის, თუ რას ნიშნავს პერსპექტივაზე გათვლილი პროექტის აშენება. ხელისშემშლელ ფაქტორად გვევლინება თანხა, რომელსაც ბრაიტონი რობერტოს სანაცვლოდ მოითხოვს", - განაცხადა იტალიელმა ინსაიდერმა.
შეგახსენებთ, რომ ალბიონის ამჟამინდელი მწვრთნელის კონტრაქტი გათვლილია 2027 წლამდე და მისი გამოსასყიდი თანხა 20 მილიონ ევროს შეადგენს. ჯერჯერობით უცნობია, აპირებენ, თუ არა "ლურჯ-ბროწეულისფრები" მწვრთნელის ტრანსფერზე ფულის გამოყოფას. არსებობს მოსაზრება, რომ კლუბი უფასო ვარიანტს უფრო აქტიურად განიხილავს.
