ალ-ჰილალმა საუდის არაბეთის სუპერ თასზე მონაწილეობის მიღებაზე უარი განაცხადა. მიზეზი - გადატვირთული გრაფიკი და გადაღლილობა. ტურნირი გაიმართება 19-23 აგვისტოს შუალედში და "ლურჯების" გარდა, მონაწილეებს შორის არიან ალ-ნასრი, ალ-იტიჰადი და ალ-ქადისია.
საქმე ისაა, რომ რიადული გუნდის ფეხბურთელების კონტრაქტებში გაწერილია პუნქტი - 28-დღიანი შვებულება, რაც აუცილებელი პირობა არის. სუპერ თასზე მონაწილეობის შემთხვევაში კი მოთამაშეთა თავისუფალი დრო 21 დღემდე მცირდება. სიმონე ინძაგის გუნდს ეს პრობლემა საკლუბო მუნდიალზე მონაწილეობის გამო შეექმნა.
შემცირებული შვებულების გარდა, ქინგდომ არენას ბინადრების ფეხბურთელებს ჩაუტარდათ გამოკვლევა, რომელმაც ძლიერი გადაღლილობის ნიშნები აჩვენა. საუდის არაბეთის ფეხბურთის ფედერაციამ ალ-ჰილალს შეუთვალა, რომ ამ გადაწყვეტილებას ისინი მოეკიდებიან გაგებით და სუპერ თასის გათამაშებაში სხვა კლუბს ჩართავენ.
