ცნობილი ამბავია, რომ წლების წინ, ლონდონის არსენალი ხვიჩა კვარაცხელიათი ინტერესდებოდა. ამ ფაქტის შესახებ ისაუბრა ინგლისური კლუბის ექს-სკაუტმა, ტომას პაშიეჩნიემ, რომელმაც აღნიშნა, რომ "მეთოფეებმა" ქართველი ვინგერის ფორმა დაიწუნეს. ეს ყველაფერი 2022 წლის ზაფხულში ხდებოდა.
ემირეიტსის ბინადრების უარის შემდეგ, საქართველოს ნაკრების ლიდერი გადავიდა ნაპოლიში, ინგლისურმა გუნდმა კი მის ნაცვლად სან პაულოდან მარკინიოს ალენკარი დაიმატა. როგორ წარიმართა ორი ახალგაზრდა ვინგერის კარიერა? "ჯვაროსნების" მე-7 ნომერმა "პარტენოპეისთან" ერთად მოიგო სკუდეტო, მიმდინარე სეზონში კი ტრებლი პარის სენ-ჟერმენთან ერთად.
დიახ, 24 წლის გარემარბი დაეუფლა ჩემპიონთა ლიგის, ლიგა 1-ისა და საფრანგეთის თასის ტიტულებს. ამის გარდა, მან წვლილი "აძურის" მიერ სკუდეტოს მოგებაშიც შეიტანა. არ უნდა დაგვავიწყდეს ისიც, რომ კვარამ ევროპის ყველაზე პრესტიჟული საკლუბო ტურნირის ფინალში შეაგდო გოლი, მილანის ინტერის კარში.
რაც შეეხება ბრაზილიელ გარემარბს, მიკელ არტეტას გუნდში დამკვიდრება მან ვერ მოახერხა. ექვსი მატჩი და მხოლოდ ერთი გოლი - ასეთი არის არსენალის ვინგერის მონაგარი. აღსანიშნავია ისიც, რომ უშუალოდ ინგლისის ჩემპიონატში მან მხოლოდ 1 შეხვედრა ჩაატარა. ადაპტაციასთან დაკავშირებული პრობლემების შემდეგ, ლონდონელებმა 22 წლის ვინგერი იჯარით მალევე გაუშვეს.
"მეთოფეების" ყოფილმა 27-ე ნომერმა განათხოვრების წესით მოიარა ნორვიჩი, ნანტი და ფლუმინენსე. მიმდინარე წლის ზამთრიდან კი ის შეუერთდა კრუზეიროს, ასევე იჯარით. ბოლოს კი ორი მოთამაშის სატრანსფერო ფასის შესახებ, ქართველი ვინგერის ღირებულება გაიზარდა 90 მილიონამდე, მარკინიოსის კი 6 მილიონამდე დაეცა.
