ცენტრალური მცველის პოზიციაზე შემცვლელი სჭირდება სიმონ კიაერს, რომელსაც კონტრაქტი ივნისში ეწურება. მთავარ კანდიდატად ლილიან ბრასიე მოიაზრება, რომელსაც კლუბი ზამთარშიც დაუკავშირდა. მოთამაშის პოზიცია ნათელია - სან სიროდან ზარის შემთხვევაში, ის ბარგს დღესვე ჩაალაგებს. პრობლემა ბრესტის ფინანსური მოთხოვნაა, 12 მილიონის სახით.
სხვა კანდიდატებად განიხილებიან: ტრევორ ჩალობა, ბენუა ბადიაშილი, ტოსინ ადარაბიო, მაქსენ ლაკრუა, ლოიდ კელი. იტალიური გუნდი ფინანსურად ყველაზე ოპტიმალურ ვარიანტს აირჩევს. მიუხედავად იმისა, რომ სტეფანო პიოლის განკარგულებაში არაერთი ფორვარდია, კლუბი ინვესტიციას ამ პოზიციაშიც ჩადებს.
სიაში არის ოთხი კანდიდატი: ჯონათან დევიდი, ჯოშუა ზირკზე, სანტიაგო ხიმენესი და ბენიამინ შეშკო. ოთხივე თავდამსხმელის საშუალო ფასი 40 მილიონია. შეშკო ყველაზე უკეთ ჯდება მილანის სათამაშო სტილში, ის ზლატან იბრაჰიმოვიჩს ან ოლივიე ჟირუს მოგაგონებთ. ბოლო წლებში, კლუბის ტენდენცია სწორედ ასეთი ფორვარდების შერჩევაა.
ხიმენესი როტერდამის ფეიენოორდში ნამდვილი გოლების მანქანაა და მას სხვა არაერთი ევროპული გრანდი აკვირდება. ზირკზე ამ სიაში ყველაზე მრავალფუნქციურია, მას იხილავთ როგორც ფორვარდის, ასევე გარემარბის პოზიციაზეც და მას სიღრმიდან შეტევაც კარგად გამოსდის. დევიდი კი უბრალოდ კარგად ნაცნობი, ძველი ვარიანტია.
"როსონერი" აკვირდება ხუან მირანდასაც. ბეტისმა ამ უკანასკნელთან კონტრაქტის განახლების შეთანხმება ვერ მოახერხა. ის ტეო ერნანდესის დუბლიორად მოიაზრება. შუახაზში, ჯერჯერობით, ერთადერთ ვარიანტად განიხილება კარნი ჩუკვუემეკა, რომელიც ლონდონის ჩელსიში თავის დამკვიდრებას ვერ ახერხებს, იტალიური კლუბის რამდენიმე მოთამაშისთვის ეს უცხო სულაც არ არის.
Marco Fallisi © RCS MEDIAGROUP
