რედ ბულის გლობალური სპორტის ხელმძღვანელმა იურგენ კლოპმა ბოლო ინტერვიუში 2013 წლის მოვლენები გაიხსენა, რა დროსაც გერმანელმა სპეციალისტმა მანჩესტერ იუნაიტედის შემოთავაზებაზე უარი განაცხადა.
"რატომ ვუთხარი უარი მანჩესტერ იუნაიტედს 2013 წელს? რადგან შეხვედრებზე ისეთ რაღაცებს მეუბნებოდნენ, რაც არ მომწონდა. "ჩვენ ვიყიდით ყველა იმ მოთამაშეს, ვისაც აარჩევთ, ჩვენ დავიმატებთ მას, და მას, და მას..." და მე იქ ვიჯექი და ვფიქრობდი, ეს ჩემი ტიპის პროექტი არ არის.
არ მსურდა პოლ პოგბას დაბრუნება, რადგან ვიცოდი, რომ ეს არ იმუშავებდა. არ მინდოდა კრიშტიანუ რონალდუს დაბრუნება, რადგან ეს ტრანსფერი წინ არ წაგვწევდა. მათი იდეა კლუბში საუკეთესო მოთამაშეების მოყვანა იყო, მაგრამ ისინი შედეგებზე და მოსალოდნელ რისკებზე არ ფიქრობდნენ. ამის შემდეგ კი სუფთა საფეხბურთო პროექტი გამოჩნდა, რომელსაც მარტივად დავთანხმდი - საუბარი რა თქმა უნდა ლივერპულზეა.
ყველამ კარგად ვიცით, რომ ლიონელ მესი მსოფლიოში საუკეთესოა, მაგრამ თუნდაც მისი მოყვანა პრობლემებს არ მოაგვარებდა. იმ დროს, 2013 წელს, ცხადია, პრობლემა კრიშტიანუში ან პოგბაში არ ყოფილა, მაგრამ საქმე იმაში იყო, რომ საუკეთესო მოთამაშეების ერთად შეკრება წარმატებას არ მოიტანდა. იქ ვიჯექი და ვფიქრობდი - "არა, დარწმუნებული არ ვარ, ეს ჩემთვის არ არის, რაღაც არასწორია."
ლივერპულში კი ყველაფერი იდეალურად განვითარდა და ჩვენ შევქმენით რაღაც განსაკუთრებული, რომელზეც სულ ისაუბრებენ."
