"ფიტნეს დარბაზში ვიყავი, ჩემი მეგობრები იყვნენ ჩამოსულები და ვსაუბრობდი, მათთვის მატარებლის ბილეთი უნდა ამეღო და ამ დროს, უცხო ნომერი მირეკავს. რომ შევამოწმე, ზურაბ ხიზანიშვილი იყო და ყველაფერს მაშინვე მივხვდი. ეროვნულ ნაკრებში მოხვედრა ჩემი ბავშვობის ოცნება იყო და უბედნიერესი ვარ"
ესპანეთთან და ბულგარეთთან მატჩებისთვის ვილი სანიოლმა 2 დებიუტანტს უხმო. ერთი იური ტაბატაძეა, რომელიც უკვე ყველამ გაიცნო და მასთან ექსკლუზიური ინტერვიუც გვქონდა, მეორე კი 20 წლის სანდრო ნარიმანიძე, რომლის შესახებაც უმრავლესობამ არ იცის და მისმა სანაკრებო სიაში მოხვედრამ კითხვები გააჩინა - ვინ არის? სად თამაშობს?
რეალობა კი ასეთია - 20 წლის სანდრო ნარიმანიძემ ბევრი იშრომა, რათა მისთვის საქართველოს ნაკრების კარი გახსნილიყო. იბერიას აკადემიაში დაწყებული კარიერა სლოვაკურ ჟილინაში გაგრძელდა. თავიდან ისმეორე გუნდში იყო. ნარიმანიძე ჟილინაში ბაზაზე ცხოვრობს, მთლიანად ფეხბურთზეა ორიენტირებული და მისმა შრომამ შედეგი გამოიღო - წელს სანდრო ჟილინას ძირითადის ფეხბურთელია, ჟილინა კი სლოვაკეთის ჩემპიონატის ლიდერია.
"აქ ყველანაირი პირობაა იმისთვის, რომ განვვითარდე. სისწრაფეებზე და სხვა მნიშვნელოვან კომპონენტებზე ბევრს გვავარჯიშებენ და ჩემი პროგრესიც ამან გამოიწვია.. ეს სეზონი კარგად დავიწყეთ, კარგი და შეკრული გუნდი ვართ. ყველაფრით კმაყოფილი ვარ. ბაზაზე ვცხოვრობ, ცოტა რთულია, თუმცა ჩემი კარიერული განვითარებისთვის ასეა საჭირო, რადგან ბევრს ვვარჯიშობ და სულ ფეხბურთზე ვფიქრობ."
ნარიმანიძე პოზიციით მარცხენა ცენტრალური მცველია, ცაცია ფეხბურთელი, რომელიც იდეალურად აკმაყოფილებს თანამედროვე მცველის მოთხოვნებს და დაცვის ხაზის ბოლო დროინდელი თამაშებიდან გამომდინარე, ჩვენს ნაკრებს ის აუცილებლად სჭირდება.
"გუშინ, კვარას, მიქაუტაძეს და მამარდას ჩემპიონთა ლიგაზე ტელევიზორში ვუყურებდი, დღეს კი მათი თანაგუნდელი ვარ და მათთან ერთად ვარჯიში მომიწევს, რაც ჩემთვის დიდი მოტივაციაა. ეს ყველაზე ერთიანი საქართველოს ნაკრებია ისტორიაში და მიხარია, რომ მათი ნაწილი გავხდები."
"ნაკრებში გამოძახების ისტორიას რომ დავუბრუნდე, ჩვენს საუბარს ჩემი მეგობრები ისმენდნენ და პირველი მათ მომილოცეს, მაშინვე ჩამეხუტნენ და გაეხარდათ. ამის შემდეგ კი ეს ამბავი პირველი მამას ვახარე"
ეროვნულ ნაკრებამდე, ნარიმანიძე 21-წლამდე ნაკრების წევრი იყო, წინა შეკრებაზე გოლიც გაიტანა. სლოვაკეთში გამართულ 21-წლამდე ევროპის ჩემპიონატზე კი ნაკრების ყველა მატჩს დაესწრო და ბოლომდე ჩართული იყო.
"21-წლამდე ნაკრებს ჩემს განვითარებაში დიდი წვლილი მიუძღვის. რამაზ სვანაძე ძალიან კარგი სპეციალსიტია და მასთან მუშაობა კომფორტულია. ვფიქრობ, ნაბიჯ-ნაბიჯ ახალი ფორმაციის ნაკრები განვითარდება, რადგან სვანაძემ იცის, როგორ ათამაშოს გუნდი"
"ამჟამინდელ ეროვნულ ნაკრებში კაშიას გარდა ტაბატაძეს და სიგუას ვიცნობ. ნაკრებში ადაპტაცია არ გამიჭირდება, რადგან როგორც ვთქვი, შეკრული გუნდია და ყველა ერთმანეთთან ახლოსაა."
ცნობისთვის, ახალგაზრდა ნარიმანიძე პირველად გურამ კაშიამ შეამჩნია. დღეს კი ისე მოხდა, რომ ეროვნული ნაკრების კაპიტანი "თავის აღმოჩენასთან' ერთად საქართველოს ნაკრებში ითამაშებს.
"პორტუგალიაში ვიყავით, 18-წლამდე ნაკრებს თამაში გვქონდა და გურამ კაშიას თანაგუნდელმა, ვლადიმირ ვაისმა უმცროსმა შემამჩნია. გურამმა დამირეკა და მითხრა, რომ ვაისს ჩემთან საუბარი უნდოდა. მას თავისი სააგენტო აქვს და სურდა, ამ სააგენტოს წევრი ვყოფილიყავი, სიამოვნებით დავთანხმდი და ასე მოვხვდი სლოვაკეთში. კაშო ბევრ სასარგებლო რჩევას მაძლევდა ხოლმე"
მსოფლიო საუკეთესო გუნდის წინააღმდეგ, სავსე დინამო არენაზე - ალბათ, ეს ყველა ფეხბურთელის ოცნებაა - სანდრო ნარიმანიძე ამ ოცნებას სულ მალე აიხდენს.
"ეს მხოლოდ დასაწყისია. ბოლომდე უნდა ვივარჯიშო და ის შანსები უნდა გამოვიყვენო, რასაც მწვრთნელი მომცემს როგორც გუნდში, ისე ნაკრებში. დინამო არენაზე საქართველოს ნაკრების თამაშებზე სულ დავდივარ ხოლმე და ოცნებებში წარმომედგინა, როგორი იქნებოდა, მეც რომ მოედანზე ვყოფილიყავი და ეს ოცნება ხდება. ამ მომენტს დიდი იმედებით ველოდები."
