გუტი: "კვარაცხელია ძალიან მომწონს და მას რამდენჯერმე ვესაუბრე"

ესპანეთის ეროვნული ნაკრების და მადრიდის რეალის ყოფილმა ფეხბურთელმა, გუტიმ ხვიჩა კვარაცხელიაზე ისაუბრა.

"კვარაცხელია ძალიან მომწონს. მას ჯერ პირადად არ შევხვედრილვარ, თუმცა, ინსტაგრამზე ვისაუბრეთ. ეს არის სოციალური ქსელის დადებითი მხარე - არ აქვს მნიშვნელობა სად ხარ, შეგიძლია წამებში დაუკავშირდე ადამიანს და გაესაუბრო."

"როდესაც აღმოვაჩინე, რომ კვარაცხელიას ბავშვობის კერპი ვიყავი მას მაისური გავუგზავნე ავტოგრაფით და შემდეგ ინსტაგრამზე ერთმანეთი გამოვიწერეთ. ძალიან სასიამოვნოა, როცა შეგიძლია ბავშვებს ფეხბურთი შეაყვარო და თამაში დააწყებინო. ერთ დღეს შესაძლოა ისინი დიდი ვარსკვლავები გახდნენ, რაც ხვიჩას შემთხვევაში მოხდა" - განაცხადა ლეგენდარულმა ფეხბურთელმა.

შეგახსენებთ, რომ ერთ-ერთი ინტერვიუს დროს ხვიჩა კვარაცხელიამ აღნიშნა, რომ გუტი მისი ბავშვობის კერპია და ესპანელმა ლეგენდამ მას მაისური გაუგზავნა.