დღეს გაიმართება კონფერენს ლიგის საკვალიფიკაციო რაუნდის მეორე ეტაპის შეხვედრა ესტონეთის ჩემპიონ ლევადიასა და საქართველოს ჩემპიონ იბერიას შორის.
მიუხედავად იმისა, რომ იბერია ჩემპიონთა ლიგის საკვალიფიკაციო ეტაპზე მალმიოსთან უშანსოდ დამარცხდა, გუნდს იდეალური შანსი აქვს, რომ მიზანს მიაღწიოს და მინიმუმ შესარჩევი ეტაპის ფლეი-ოფში გავიდეს, რადგან გზა მარტივია - თუ იბერია ლევადიას ბარიერს გაივლის,ტნს(უელსი)/დიფერდანჯი(ლუქსემბურგი)-ს შორის გამარჯვებულს შეხვდება, შემდეგ არის ფლეი-ოფი.
სამწუხაროდ, ლევადიას გასამართ შეხვედრაში იბერიას გუნდის ერთ-ერთი ლიდერი გიზო მამაგეიშვილი დააკლდება, რომელმაც წინა შეხვედრაში წითელი ბარათი მიიღო.
ლევადია იბერიასთან მატჩს კარგ განწყობაზე ხვდება. ესტონეთის ჩემპიონატში მათ თავიანთი მატჩი დამაჯერებლად, 3:0 მოიგეს.
ლევან კორღალიძე: "სასურველი შედეგი ყოველთვის გამარჯვებაა და ჩვენ ამისთვის ბოლომდე დავიხარჯებით. საქართველოს მოქმედი ჩემპიონები ვართ და რა თქმა უნდა, ყოველთვის მაღალი მიზნებისთვის ვიბრძვით. ყველა თამაშში ჩვენი პროგრამა მინიმუმი - გამარჯვებაა, რისთვისაც ყველაფერს გავაკეთებთ."
იური ტაბატაძე: "ესტონეთში პირველად ვარ, ტალინი კარგი ქალაქია და ვფიქრობ კარგი გარემოა ხვალინდელი თამაშისთვის. გასვლითი მატჩით დაწყება - ვფიქრობ, გარკვეულწილად, უპირატესობას გვანიჭებს, რადგან მოწინააღმდეგეს უფრო მომზადებულები დავხვდებით სახლში. ვფიქრობ, რთული თამაში გველოდება. ლევადიას ორივე თამაში ვნახე რფს-თან და ფიზიკურად რთული თამაში იქნება. ლევადია საკმაოდ დაბალანსებული გუნდია, რომელსაც კარგი მწვრთნელი ჰყავს. ველოდებით ინტენსიურ თამაშს".
ლევადია - იბერია
კონფერენს ლიგა, II ეტაპი
23 ივლისი, 20:30
ა.ლე ქოქ არენა, ტალინი
მთავარი მსაჯი: იოჰან ელეფსენი (ფარერები)
იბერიას სავარაუდო შემადგენლობა: მაკარიძე, გ.ტაბატაძე, ჯგერენაია, აგიაკვა, ზოჰური, კლასი, დადიანი, ქარდავა, სილაგაძე, ტაბატაძე, რუშევიჩი
