მიმდინარე სეზონში, ქუთაისურ კლუბში კიდევ ერთი გამორჩეული ტალანტი გამოჩნდა, რომელმაც მწვრთნელების ნდობა დაიმსახურა და ჯერჯერობით, იმედებს ამართლებს.
18 წლის ალეკო ბასილაძე სამგურალთან მატჩში მოედანზე 81-ე წუთზე შემოვიდა, 97-ე წუთზე ტორპედოს მაისურით სადებიუტო გოლი გაიტანა, გასულ ტურში კი იბერიასთან თერთმეტმეტრიანი მოიპოვა.
"ტორპედოს მაისურით სადებიუტო გოლი ჩემთვის ძალიან ემოციური იყო. მაქსიმალურად ვცდილობდი, რომ ამ გუნდში თავი კარგად წარმომეჩინა, რათა შანსი მომცემოდა და მიხარია, რომ სამწვრთნელო შტაბი მენდო. ამ გუნდის მაისურით თამაში ჩემთვის პატივია და დიდი პასუხსიმგებლობით ვეკიდები, რათა გულშემატკივრისა და ყველას იმედები გავამართლო."
გზა ტორპედოს ძირითად გუნდამდე...
- ფეხბურთზე 7 წლის ასაკში შევედი, რის შემდეგაც ტორპედოს აკადემიაში მოვხვდი. იქ მას შემდეგ მიმიღეს, რაც რამდენიმე ტურნირზე თავი გამოვიჩინე. აკადემიაში რამდენიმე მწვრთნელი მყავდა, რომელთაც ჩემს განვითარებაში დიდი წვლილი შეიტანეს და თითოეულს მადლობას ვუხდი ამისთვის. ასევე დიდი მადლობა ყველა იმ ასაკობრივი ნაკრების მწვრთნელს, რომლებიც გვერდში მიდგანან."
როგორც მოგეხსენებათ, ტორპედოს დიდი მიზნები აქვს, ჩემპიონობისთვის იბრძვის, კონფერენს ლიგაზე მიზნად ჯგუფში მოხვედრა აქვს დასახული და რამდენიმე ლეგიონერიც ჩამოიყვანა. ამის ფონზე კი გუნდს ჰყავს ადგილობრივი ტალანტი, რომელსაც სათამაშო დრო და ნდობა აქვს.
"დიდი მადლობა მინდა გადავუხადო სტივ კინს, რომელიც ასეთ მნიშვნელოვან მატჩებში და მნიშვნელოვან დროს მენდობა. მას ჩემს კარიერულ წინსვლაში უდიდესი წვლილი მიუძღვის და მასთან მუშაობა ჩემთვის კომფორტულია."
ადაპტაცია დიდ გუნდში და თანაგუნდელები
- ტორპედოს ძირითად გუნდში ადაპტაცია არ გამიჭირდა, აქ მეგობრული გარემოა. ყველა ფეხბურთელი გვერდში მიდგას და რჩევებს მაძლევს. გამოვყოფდი ლაშა შერგელაშვილს, რომელთან ერთად თამაშიც საკმაოდ კომფორტულია. მოედნის გარეთ ჩემი მთავარი მრჩეველი მათე აბულაძეა. მოკლედ რომ ვთქვა, ყველანაირი გარემო მაქვს იმისთვის, რომ განვვითარდე.
ამ გუნდის ყველა თამაშზე დავდიოდი, ტრიბუნიდან ვგულშემატკივრობდი, ხანდახან ბურთის მომტანიც ვიყავი ხოლმე, დღეს კი ტორპედოს მთავარ გუნდში ვარ. ეს ჩემი ოცნება იყო. იმ ქალაქის კლუბში ვთამაშობ, სადაც გავიზარდე - ამაზე მაგარი გრძნობა არ არსებობს.
ტორპედოში გულშემატკივრის ფაქტორი დიდია. თავიანთ ფეხბურთელებს ყოველთვის გვერდში უდგანან, მით უმეტეს ახალგაზრდა თაობას და ამას ბასილაძეც აღნიშნავს:
"გულშემატკივრისგან დიდ მხარდაჭერას ვგრძნობ, რაც უდიდესი სტიმულია. მათი შეძახილები მოტივაციას მაძლევს, რათა ისინი გავახარო და ჩვენს გუნდს წარმატება მოვუტანო."
