გუშინდელი ფრენის შემდეგ, ფეხბურთელებმა კარგად დაისვენეს და დღეს აქტიურად ივარჯიშეს როგორც ფიტნეს დარბაზში, ისე მოედანზე. ვარჯიშამდე კი მათ მცირე ხნით ქალაქშიც გაისეირნეს.
ვარჯიშამდე 30 წუთით ადრე, ვილი სანიოლმა და გიორგი მამარდაშვილმა მატჩისწინა პრესკონფერენცია გამართეს და ალბანეთთან შანსები შეაფასეს. გასაკვირი არაა, რომ ისინი ხვალინდელ მატჩში მხოლოდ 3 ქულის მოპოვებას გეგმავენ.
ვარჯიში დაიწყო. ვილი სანიოლმა ფეხბურთელები თავისთან შემოკრიბა და რჩევა-დარიგებები მისცა. სანიოლის სიტყვით გამოსვლა ჩვეულებრივზე მეტხანს გაგრძელდა.
ფრანგმა სპეციალისტმა ფეხბურთელებს უთხრა, რომ მათ ტემპი არ უნდა დააგდონ, წინსვლა უნდა გააგრძელონ და ნაბიჯ-ნაბიჯ კიდევ მაღლა ავიდნენ. მან ასევე, ხვალინდელი მატჩის მნიშვნელობაზეც ისაუბრა.
ვარჯიშის საწყისი ეტაპი ე.წ. რონდოს დაეთმო, სადაც წრეში 3 ფეხბურთელი იყო. ყველასთვის ცნობილია, თუ როგორ არ უყვარს გურამ კაშიას არაფერში წაგება და გამონაკლისი არც ეს იყო. ნაკრების კაპიტანს ერთი სული ჰქონდა, როდის გამოვიდოდა წრიდან და ყველა ბურთზე თავგანწირვით ორთაბრძოლაში შედიოდა.
როგორც წესი, მატჩისწინა ვარჯიში დიდხანს არ გრძელდება ხოლმე. ტაქტიკური ვარჯიშისა და დარტყმების შემდეგ, სანიოლმა სავარჯიშო პროცესი დაასრულა. სასტუმრო სტადიონიდან 50 მეტრშია.
მიუხედავად იმისა, რომ ალბანელების სტადიონი საკმაოდ თანამედროვე, ლამაზი და ორიგინალურია, ქართველი ფეხბურთელები ბალახს უჩიოდნენ. როგორც ჩანს, ტირანაში ბალახის მოვლას სათანადო ყურადღებას არ აქცევენ, რადგან რამდენიმე კვირის წინ, მსგავსი პრობლემა აქ ჩამოსულ ტორპედოსაც ჰქონდა.
ხვალ, ფეხბურთელები ფიტნეს დარბაზში მსუბუქად ივარჯიშებენ, სანიოლისგან თეორიულ ნაწილის დარიგებებს მოისმენენ და მოედანზე კიდევ ერთი 3 ქულის ჩასაწერად გავლენ.
