ინტერს ესმის ლაუტაროსგან: "კონტრაქტის განახლება? ადვილი არ არის შეთანხმება, მაგრამ ჩვენ სწორ გზაზე ვართ"

ზეიმი გრძელდება, მაგრამ მოუგვარებელი დეტალებია დარჩენილი. ყურადღების ცენტრშია ლაუტარო მარტინესი, რომელმაც მთავარი როლი ითამაშა იუვენტუსის დამარცხებაში, თუმცა დიდი ხნის ნანატრი კონტრაქტის განახლება ინტერთან, ჯერ კიდევ ბუნდოვანია. ტორომ მატჩის ბოლოს ასეთი კომენტარი გააკეთა:

"შეთანხმების მიღწევა ადვილი არ არის, მაგრამ ჩვენ სწორ გზაზე ვართ".
არგენტინელის გარშემო არსებული გაურკვევლობა ერთადერთი სამწუხარო ფაქტი იყო იმ ბედნიერ ღამეს. მიუხედავად იმისა, რომ მხარეებს შორის შეთანხმება ჯერ არ არის მიღწეული, თავდამსხმელს, უპირველეს ყოვლისა, სურდა გულშემატკივრების დამშვიდება:

"ნუ ინერვიულებთ, მე და ჩემი ოჯახი მილანში ბედნიერები ვართ".

ტოროს, რომელიც მზადაა ინტერთან კონტრაქტი გაახანგრძლივოს 2028 წლამდე, სურს, რომ გულშემატკივრებისთვის "ნერაძურის" სიმბოლოდ დარჩეს. როდესაც არგენტინელი საუბრობს "შეთანხმებაზე, რომელიც არ არის ადვილი მისაღწევი", ის აშკარად გულისხმობს მოლაპარაკებებში არსებულ სირთულეებს.

ეს ეხება როგორც მოთამაშეს, ასევე კლუბს, რომელიც ტოროს ყველაზე მაღალანაზღაურებად მოთამაშედ აქცევს გუნდში, რაც კიდევ უფრო აამაღლებს სახელფასო ზღვარს. კონკრეტულად, საუბარია ლაუტაროსთვის ხელფასის ერთი მილიონით მატებაზე. ფეხბურთელს მოქმედი კონტრაქტი 2026 წელს ეწურება.

არგენტინელმა ხელი უნდა მოაწეროს 2028 წლამდე დარჩენას, რათა სეზონში შვიდი მილიონი მიიღოს და ამით გაუსწროს ჰაკან ჩალჰანოღლუს. 6,5 მილიონი ხელფასით, ამჟამად გუნდში ის ლიდერია. გარდა ხელფასის ზრდისა, რჩება სხვა უმნიშვნელო დეტალების დადგენა, როგორებიცაა სხვადასხვა პრემია, პრიზი თუ ბონუსი. რაც არ უნდა იყოს, ჯერჯერობით, ზეიმი გრძელდება.

Adriano Seu © RCS MEDIAGROUP