სტამბოლის გალათასარაის თავდამსხმელმა, ვიქტორ ოსიმენმა დაასახელა გუნდი, სადაც გადასვლაზე უარს ის არ იტყოდა. აფრიკელი ფორვარდისთვის ასეთი კლუბი ტურინის იუვენტუსი არის. შეგახსენებთ, "ლომებში" ტრანსფერამდე, ნიგერიელი შემტევის სახელს სწორედ "ბიანკონერის" უკავშირებდნენ.
"იუვენტუსი - მსოფლიოს ერთ-ერთი საუკეთესო გუნდია. აქ თამაშობდა უამრავი ლეგენდა, რომელმაც წარუშლელი კვალი დატოვა. გალათასარაიში ტრანსფერამდე, ვფიქრობდი ტურინში გადასვლაზე, მაგრამ გაჩნდა სირთულეები და გარიგება არ შედგა. ვნახოთ, რა იქნება მომავალში.
სტამბოლში ყოფნით ბედნიერი ვარ და აქ ყველაფერი მაკმაყოფილებს, თუმცა არის რამდენიმე გუნდი, სადაც თამაშს ვისურვებდი და ერთ-ერთი ასეთი სწორედ "ბიანკონერია". ვფიქრობ, ამ კლუბში თამაშზე ყველა ოცნებობს."
ნიგერიელი თავდამსხმელის ალიანს სთეიდიუმზე გადასვლა კვლავ აქტუალური ჩემპიონთა ლიგის პლეიოფის შემდეგ გახდა. აფრიკელმა ფორვარდმა არ აღნიშნა გოლი ლუჩანო სპალეტის გუნდის კარში და ამის გარდა, მან სოციალურ ქსელში ალექს დელ პიეროსთან გადაღებული ფოტო განათავსა.
