დღეს, ინგლისის ასოციაციის თასის მესამე რაუნდის ფარგლებში ლონდონის არსენალი პორტსმუთს ესტუმრება. ნოსტალგიური მატჩის წინ კომენტარი გააკეთა "მეთოფეთა" ლეგენდარულმა კაპიტანმა, ტიერი ანრიმ, რომელსაც "პომპისთან" განსაკუთრებულად ტკბილი მოგონებები აკავშირებს.
ყველაფერი დაიწყო 2004 წლის მარტში, როდესაც არსენ ვენგერის დაუმარცხებელმა გუნდმა ჰემპშირელები გაანადგურა ანგარიშით 5:1, ფრანგმა ფორვარდმა კი 2 ბურთი შეაგდო. ჰარი რედნაპის გუნდის ქომაგები იმდენად იყვნენ აღფრთოვანებული მისი თამაშით, რომ შეხვედრის დასრულების შემდეგ, ჰაიბერის ბინადრების ლიდერის გვარის სკანდირება დაიწყეს.
ორი თვის შემდეგ, განმეორდა იგივე, როდესაც არსენალისა და პორტსმუთის მატჩი დასრულდა ფრედ, ანგარიშით 1:1. ყურადღების ცენტრში მოექცა კვლავ ლონდონელთა მე-14 ნომერი, რომელიც გააცილეს ოვაციებით და ამის გარდა, "პომპის" ხელმძღვანელობას ხუმრობით მისი გაფორმება მოთხოვეს.
"ის, რაც მოხდა პორტსმუთთან მატჩში, სიგიჟე იყო. 5:1 გავანადგურეთ, ისინი კიდევ ჩემს გვარს სკანდირებდნენ. ვფიქრობდი - დიდი ანგარიშით მოგიგეთ, რატომ არ ბრაზდებით ჩემზე? შემდეგ შეხვედრაში, თამაშის დასრულების შემდეგ მე "პომპის" ფორმის მორგება გადავწყვიტე.
მაისური ხშირად გამიცვლია, თუმცა მოედანზე არასდროს მომირგია სხვისი გუნდის ფორმა. ჰემპშირში ვიგრძენი ისეთი მუხტი, რომ ლუა-ლუასთან გაცვლილი მაისური იქვე ჩავიცვი."
