პრემიერ ლიგის მიმდინარე სეზონის მე-19 ტურისთვის მოხდა საინტერესო დამთხვევა: პირველიდან - მერვე ადგილამდე არიან გუნდები, რომლებმაც ინგლისური ფეხბურთის ისტორიაში მოიგეს ყველაზე მეტი ტიტული, ჯამში 91. მსგავსი რამ აღნიშნული ლიგის ისტორიაში არასდროს ყოფილა.
თავად განსაჯეთ - არსენალი (13), მანჩესტერ სიტი (10), ასტონ ვილა (7), ლივერპული (20), ჩელსი (6), მანჩესტერ იუნაიტედი (20), სანდერლენდი (6), ევერტონი (9). როგორც აღვნიშნეთ, ჩამოთვლილ 8 კლუბზე ხშირად ინგლისის ჩემპიონი არავინ გამხდარა. ეს ჯაჭვი გაგრძელდებოდა იმ შემთხვევაში, თუ 10-ეულში იქნებოდნენ ნიუკასლი და უენსდეი, რომლებსაც 4-4 ტიტული აქვთ.
"კაჭკაჭები" არიან მე-13 ადგილზე, "ბუები" კი საერთოდ, ჩემპიონშიპში ასპარეზობენ. რა თქმა უნდა, ეს დამთხვევა მათ გარეშეც ისტორიული და სიმბოლურია. მომავალმა ტურმა, რომელიც დაიწყება 3 იანვარს, შესაძლოა აღნიშნული წყობა დაარღვიოს, იმის გათვალისწინებით, რომ მე-8 პოზიციასთან ახლოს სხვა, ნაკლებად ტიტულოვანი კლუბები არიან.
